Dwklongj dwg cungj diuqfoux ndawbiengz gaeuqgeq Mbanjcuengh ndeu. Gij hwngfat lizsij dwklongj Bouxcuengh Duh’anh Yauzcuz Swciyen gig gyaenanz, geij bi gonq gaenq ndaej liedhaeuj swcigih gaep feihvuzciz vwnzva yizcanj baujhoh mingzloeg.

Mboengqneix, aen yienh neix banh aen ban son’gyauq dinfwngz diuq foux “dwklongj”, aen ban neix miz gyoengqvunz vwnzva’gvanj、vwnzgunghdonz caeuq cancangj vwnzva can gak aen yanghcin、bouxvunz youqgaenj ndaw yisuz donzdij ndawbiengz、vwnzyi donzdui yezyiz caeuqfaenh. Muzdiz dwg gungganq caeuq hwngfat buek vunz swnjcienz dwklongj vwnzva “feihyiz” ndeu. Baez son’gyauq neix, iucingj bouxswnjcienz swcigih feihvuzciz vwnzva yizcanj Cinz Sufangh daeuj hwnjdangz, neiyungz miz gij dungcoz diuqfoux ndaemnaz、dajsou、fad- haeux、daemhaeux daengj gij ging- gvaq guhhong neix. Gyoengq bouxhag cungj naeuz, itdingh aeu ndeindei hag、dawzndei dinfwngz, baenz bouxswnjcienz caeuq bouxbaujhoh faenh vwnzva yizcanj dijbauj neix.

Ciuq lizsij swhliu, dwklongj daj Ciuhdangz hainduj miz, daengz seizneix gaenq miz 1000 lai bi lizsij lo, dwg cungj biujyienh hingzsik diuqfoux gyoengqvunz Bouxcuengh doekceh、gaj nonhaih、dajsou、fadhaeux、daemhaeux daengj ndeu, riuzcienz youq Mbanjcuengh Guengjsae Duh’anh、Dava、Majsanh daengj dieg, dwg feihvuzciz vwnzva yizcanj maenhndei Bouxcuengh.

(Lanz Fuzgvanh/蓝福宽)