Youq gyajseizhwngq fatseng le haujlai gienh saeh, geq hix geq mbouj liux. Hoeng miz gienh saeh he hawj gou baenzlawz hix lumz mbouj ndaej, caemhcaiq ndaejik baenzlai.

Geiqndaej haemh haenx, gou caeuq daxmeh gou bae youz. Doek- laeng dou byaij daengz laj laeuz seiz, raen miz haujlai lwgnyez humx naengh youq naj aen daiz hung he, mbouj rox gyoengqde cingq guh maz.

Gou roxnyinh geizheih couh byaij gvaqbae yawj, baez cam cij rox: Yienzlaiz cijaeu youq dan neix cawx gij gunghyibinj, doeklaeng moix haemh couh ndaej daeuj gizneix hawj gij gunghyibinj cawx gvaq daz saek.

Gou roxnyinh mizyinx bw, couh heuh daxmeh cawx aen gunghyibinj ndeu hawj gou. Daxmeh doengzeiq lo, gou angq raixcaix. Doeklaeng, gou couh hainduj senj lo. Gunghyibinj gizneix miz gig lai gig daih, miz vunzgajdungh、doenghduz ndeigyaez、ranzlaeuz…… Gak cungj gak yiengh, baij rim aen daiz, yawj ndaej gou daraiz caez, caenh ngeix cungj cawx caez dawz dauq ranz bae. Doeksat, gou senj bae senj dauq, senj aeu aen gvaengzsiengq he, gou yaek hawj de hwnjsaek, yienzhaeuh dawz mbaw siengq daengx ranz cuengq haeujbae.

Daz saek lo, gaxgonq gou laih- naeuz gig yungzheih. Hoeng, daengz gou hainduj doenghfwngz gaem bit bae daz seiz, cij rox gienh saeh neix geij dwgrengz bw! Aeu sien senj saek, senj gij saek haenx aeu doxboiq ndaej ndeiyawj cijndaej, vanzlij gonj bitveh mbouj ndei gaemhanh, ciengzseiz deng daz daengz gizwnq bae. Daz le gig nanz hix daz mbouj ndaej geijlai. Gou ienqhoij lo, mbouj nyienh guh roengzbae lo. Youq seizhaenx, gou sawqmwh ndaej geiq coenz vah daxboh gou ciengz doiq gou gangj haenx——“Gwnzbiengz mbouj miz saeh nanz guh, couh lau vunz haeujsim bae banh.”

Ngeix daengz gizneix, gou menh- menh ansim roengzdaeuj, nyinhcaen dwk daz, daj senj saek daengz daz saek, mbat bit mbat veh, sijsaeq bae guh.

Gou laebdaeb daz le sam haemh, dauqdaej daz aen gvaengzsiengq ndei lo. Yawj gij gvaengzsiengq gou yungh haujlai seizgan caeuq simgei bae daz saek, ndawsim gou gig angqyangz. Yienznaeuz miz giz daz ndaej mbouj ndei, hoeng gou lij dwg nyinhnaeuz de beij gij gvaengzsiengq daj baihrog cawx caemhcaiq caeux couh youq gunghcangj couh guh baenz ndeiyawj.

Gou gangj gij saeh gou vih gvaengzsiengq daz saek hawj daxboh gou dingq, de haenh gou menhmenh maj hung lo, roxsoq lo. Doeklaeng, gou caeuq daxmeh gou dawz mbaw siengq daengx ranz cuengq haeujbae, cibfaen habsik, yied yawj yied gyaeundei.

Neix couh dwg gienh saeh ceiq yinx ceiq angq gou youq gyajseiz- hwngq guh gvaq haenx, doenggvaq gienh saeh neix, gou hag daengz: Mboujlwnh guh maz, cungj aeu yunghsim bae guh.

(loeg nienzgaep Cau Gyahyungj)