7 nyied 26 hauh, Yungzsuij Myauzcuz Swciyen Minzcunghgiz youq Vaizbauj Cin Hozcunh haiguh aenban son’gyauq dinfwngz yungh faexcuk dajsan doxgaiq gunghyi minzcuz guh 15 ngoenz haenx. Baez aenban son’gyauq neix miz 50 boux caeuqfaenh, daengxcungq dwg meh- mbwk ranzgungzhoj Hozcunh.

Baez son’gyauq neix cingj Gyaj Cenbingz boux lauxhangz vehveh gunghyi Guengjsae、 bouxswnjcienz feihyiz, lijswcangj Aen Hozcozse Yungh Faexcuk Dajsan Gunghyibinj Vazyungz Yungzsuij daeuj hwnjdangz. Baez son’gyauq neix neiyungz miz yungh faexcuk dajsan haeuzdaeng、 yungh faexcuk san aendeb、 yungh faexcuk dajsan buenzmak、 yungh faexcuk dajsan aenlamz、 yungh faexcuk dajsan habhaeux daengj dinfwngz dajsan doxgaiq neix. Yungh gij fuengsik sonhag yienhciengz son, bouxhag doenghfwngz, hawj bouxhag rox genj caizliuh、 luihduk、yot duk daengj dajsan daengx dauq dinfwngz cugyamq hag. Bouxhab hag baenz le, doenghgij doxgaiq dajsan okdaeuj haenx youz Aen Hozcozse Yungh Faexcuk Dajsan Gunghyibinj Vaz- yungz Yungzsuij doengjit yungh ngaenz soucawx, gaijgez le gij vwndiz gai doxgaiq bouxhag.

Ciuq cam rox, Hozcunh miz faexcuk haemq lai, aen hozcozse yungh faexcuk dajsan gunghyibinj yungh gij faexcuk miz lai Mbanjmyauz neix, saeqsim gyagoeng baenz gunghyibinj okhingz ndeiyawj, daez- sang gyaqcienz de, ndaej daengz vunzlai haengjgyaez.

(Mungz Vazcingh Veiz Ciginh)