Banringz, gwnzmbwn sawqmwh raemh- fubfub, fwj ndaemndatndat, daxgoeng daeng- ngoenz mbouj rox buet bae gizlawz ndoj hwnjdaeuj lo.

Rumzhaenq bongjhuhu, nyefaex deng bongj dwk bi bae bi dauq, lumj fatbag diuq fouxbibuengq nei. Boux liz ranz gyawj haenx ganjgip aeu fwngz dangj aen’gyaeuj, gipgip muengzmuengz buet ma ranz; boux liz ranz gyae haenx, cijndei ndoj haeuj bouqgaicawx henzgyawj bae. Ranz gou hix nyaengqnyatnyat lo, daxboh daxmeh ganjgip sou buh dak baihrog haenx haeuj ranz, gou dawz batva gwnz yangzdaiz hix buen haeuj ranz daeuj, daxgoeng daxbuz gven gij cueng ndaw ranz liux bae lo.

Ngamq yaepyet, rumzhaenq couh daiq gij fwnznaed daeuj lo, “bibi baba” doek roengzdaeuj, aenliengj boux byaij loh deng ci dwk doeng ngeng sae mbieng, ceng di gaem mbouj dawz lo. Boux mbouj miz liengj cijndei dawz aendaeh ndaw fwngz cuengq dingjgyaeuj dangj fwn. Fwn gig vaiq couh deihyadyad lo, yaep he couh bienq baenz fwnraq raixhumhum roengzdaeuj. Dingjranz ciengqgo “biba biba”, gwnz liengj hix hai sing ciengqgo “dingdong dingdong”, geijlai nauhyied ha!

Fwn daeuj ndaej vaiq, bae ndaej hix vaiq. Mbouj geij nanz, mbwn rongh lo, aennaj daengngoenz loh okdaeuj lo. Gvaq yaep ndeu, bien mbwn sawqmwh miz duz doengz he, gyaeundei raixcaix. Rumzliengz ci daeuj, hawj vunz gamjdaengz gig cwxcaih, vunzhung byaij okdaeuj sup hoengheiq singjsien, gyoengq lwgnyez youq gumz raemx ndawhongh guhcaemz angqvauvau.

Ciengz fwn neix daiq hawj vunzlai liengzsangj, caen dwg ciengz fwn ndei he ha!

(ngeih nienzgaep Leiz Yensinh)