Doenghbaez, miz duz moulwg coengmingz ndeu, coh de heuhguh Beigiz. Heuj de caezcingj youh hausak, de roxnyinh gig najrongh.

Beigiz caeuq daegnuengx de Gyauzci cungj rox yienghlawz baujhoh ndei gaiqheuj, aenvih canghyw duz- ciengh son gvaq gyoengqde lo. Moix haet caeuq gyanghaemh, Beigiz caeuq Gyauzci cungj sijsaeq catheuj.

Beigiz caeuq Gyauzci gig yinx guhcaemz “cang canghywheuj”. Bei- giz cang canghyw duzciengh, Gyauzci cang bouxbangfwngz canghyw duz- ciengh——duzdouq siujcej. Boux- baenzbingh couhdwg vanzgi Gyauzci——gungjlungz sienseng.

Beigiz naeuz:“Heuj mwngz caez- cingj youh hausak lai bw, gungjlungz sienseng.” “Saekmaeq! Saekmaeq!” Gyauzci heuh dwk. “O, mboujloek, duzdouq siujcej, cingj mwngz hawj gungjlungz sienseng boi raemx- riengxbak saekmaeq ndeu.”Beigiz naeuz.

Miz ngoenz ndeu, guh gvaq “cang canghywheuj” le, Beigiz caeuq Gyauzci hainduj gwn ringz lo. Sawqmwh, miz gijmiz doxgaiq doek roengz aenbuenz Beigiz daeuj lo. Beigiz diuq hwnjdaeuj! De cam:“Aiya, neix dwg gijmaz ha?” “Hw hw, neix dwg gaiqheuj.” Daxboh de riu naeuz. “De daj gizlawz daeuj ha?” Beigiz youh cam. “Mwngz bae ciuq gingq couh rox lo” Daxmeh de naeuz.

Beigiz bae ciuq gingq, raen gangzheuj gwnz bonjfaenh noix bae diuz ndeu lo! Beigiz simgip dangq- maz, heuh naeuz:“A, dai lo！Raeuz dwg mbouj dwg bae ra canghyw duzciengh cijndaej ha?”

Daxmeh naeuz:“Mbouj yungh ne, dahniq, neix dwg heujcij, daengz seiz vuenh heuj de couh loenq lo.” “Heujcij? Gijmaz dwg heujcij ha?” “Heujcij couhdwg heuj lwgnding daih’it baez maj ok haenx.” “Yienghneix, gizneix lij maj ok heuj moq daeuj lwi?” Daxmeh ngaekngaek gyaeuj.

Beigiz youh cam:“Baenzlawz cawqleix diuz heuj loenq neix ne?”“Mwngz dawz de cuengq youq laj swiz, haemhneix dahsienheuj couh maz aeu diuz heuj neix bae lo, dangguh doxvuenh, de ndaej soengq hawj mwngz naed ngaenzdih ronghsaksak he.”Daxmeh yienghneix lwnh de.

Ngoenzneix gyanghaemh, Beigiz caeuq vunz ndaw ranz yawj densi seiz, lij siengj dahsienheuj gienh saeh neix.

De naeuz “Caj gou majhung le, gou hix siengj dang dahsienheuj!” Daxboh riu lo. De cam:“Mwngz ne, Gyauzci?” Gyauzci ceij coh gungj- lungz sienseng de, daihsing hemq: “Gungjnungz(lungz)!”

“Vaiq daeuj, Gyauzci!”Beigiz heuh, “Gangj mbouj dingh dahsienheuj couh yaek daeuj lo!” Gyoengqde buet hwnj gwnz laeuz bae, bwh ndei yienghyiengh yaek ninz lo.

Beigiz youh dawz diuzheuj loenq de sijsij saeqsaeq caiq cat gvaq baez ndeu. De siengj dawz de cat ndaej youh seuqsak youh ndeiyawj, cij ndei soengq hawj dahsienheuj. Cat ndei le de couh dawz diuzheuj cuengq haeuj laj swiz bae. De cam daxmeh:“Mwngz haengjdingh dahsienheuj ra raen de ma?” “Gou haengjdingh.” Daxmeh naeuz, “mwngz couh caj youq ndaej lo.” Doeklaeng, bohmeh caeuq gyoengqde gangj gvaq ninzonj couh bae ninz lo.

“Gou mbouj ndaej ninz ndaek bw, gou yaek caj dahsienheuj daeuj!” Beigiz sim siengj, de lij lwnh Gyauzci mbouj ndaej ninz ndaek dem. Gyauzci hix dapwngq lo. Beigiz caj ha, caj ha……Sawqmwh, de dingqnyi miz gijmaz singyaem. De sim naemj dwg dahsienheuj daeuj loba, couh sing’iq cam Gyauzci:“Gyauzci, mwngz yawj- raen dahsienheuj caengz?” Mbouj raen Gyauzci ok sing, Beigiz ngaem gyaeuj baez yawj, yienzlaiz Gyauzci gaenq ninz ndaek lo, sing “hulu” haenx couhdwg de fat okdaeuj!

“Gou beij Gyauzci dingj ndaej hwnz.” Beigiz gag doiq swhgeij gangjvah. De ninz hwnj mbonq de bae, ngveihda cengq ndaej luenzloegloeg. Hoeng, mbouj gvaq geij nanz, buengzda de couh hainduj doxhoenx lo. De ganjgip cengq hung lwgda de, youq ndaw sim doiq bonjfaenh naeuz: “Gou yaek baujciz singjsak, caj daengz dahsienheuj daeuj.” Hoeng, mbouj gvaq yaep he, de hix ninz ndaek lo……

Yubyab! Yubyab! De dwg gijmaz? Dwg dahsienheuj daeuj lo!

“Mwngz ndei ha, Beigiz!” De sing’unq naeuz,“Mwngz nyienh aeu diuzheuj mwngz daeuj vuenh naed ngaenzdih lwi?”De dawz ngaenzdih saek haeuj laj swiz Beigiz bae, aeu diuzheuj okdaeuj. “Diuzheuj neix geijlai sawsak geijlai ndeiyawj ha, gyo’mbaiq mwngz!”

Haet daihngeih, Beigiz mbat hai da couh diuq hwnjdaeuj, bae yawj laj swiz de. “Va, naed ngaenzdih ronghsagsag he!” De itmienh hem itmienh diuq. “Meh, dahsienheuj caen daeuj gvaq lo! Gou maqmuengh de gyaez diuzheuj youh saw youh ndei gou.”

“De haengjdingh gyaez. Mwngz cat ndaej geijlai sijsaeq ha!” Daxboh riu dwk naeuz.

“Ai, hojsik mbouj ndaej raennaj dahsienheuj.” Beizgiz danq gaemz heiq ndeu, “Baezlaeng gou itdingh daengx haemh mbouj ninz, caj daengz de daeuj cij ndaej. Hw! Hw! Hw!”

(Ouh Caijfangh hoiz)