Aubiz okbae guhhong cungj daiq aen swiz he, naeuz mbouj rox yietnaiq couh mbouj rox guhhong.

Ngoenzhaenx, de bae gvak reih ndaem namzgva. Gvak yaep ndeu le, de couh demh aenswiz ninz lo. Daengngoenz dak ndaej de raeujrubrub, de ninz ndaej gig cwxcaih.

Yi, miuz namzgva gag diuq roengz reih bae lo, miuz namzgva sikhaek maj ok mbaw daeuj, lij hai duj va he. Va namzgva yaep he couh dawz aen namzgva iq he. Namzgva iq maj ndaej gig vaiq, yaep he couh bienqbaenz namzgva hung lo. Namzgva hung bienqbaenz bingjnamzgva, gag mbin haeuj ndaw bak aubiz bae. Aubiz gwn ndaej cingq van, simjbiz heuh de ma ranz lo.

Mwh gwn ngaiz, aubiz naeuz: “Haxbaenh gou gwn haujlai bingjnamzgva, seizneix baenzlawz lij iekngaungau ne?”

Simjbiz naeuz: “Haxbaenh mwngz dwg gyangngoenz guh loq, ndaw loq lij rih myaiz okdaeuj ne. Gij miuz namzgva dwg gou bang mwngz ndaem roengzbae bw.”

Gyangngoenz guh loq, dwg dajbeij siengjmuengh mbouj ndaej saedyienh, itbuen dwg daiq miz gij eiqsei riu vunz.

(Vang Yaujyez)