Mwh gou 4 bi, bae ranz daiq lajmbanj guhcaemz. Miz ngoenz ndeu, gou caeuq Cangh Vaj daengj geij boux lwgnyez doxcaez dik cuzgiuz, gou mbouj siujsim dik aen giuz daengz aennaj Cangh Vaj bae. Gou gipmuengz buet gvaqbae nyinhloek, siengj mbouj daengz de hujdengdeng ndaq gou coenz ndeu, huj dwk gou heiq hwnjfoedfoed. Gou siengj hwnj dax- meh naeuz gvaq lwgnyez ndaq vunz aiq deng duzdoq ndat, couh siengj bae ra rongz doq ndeu, gyongz rongzdoq hawj duzdoq ndat Cangh Vaj, daeuj gyauq de mbat ndeu. Yienghneix gou couh gyajcang simndei doiq Cangh Vaj naeuz:“Raeuz doxndei ba!” Cangh Vaj doengzeiq lo.

Gou itmienh guhcaemz itmienh laeglemx ra rongzdoq, doeklaeng youq gwnz go faex he raen aen rongzdoq he lo. Gou angq raixcaix, youq laj faex sing hung hemq: “Gyongz rongzdoq lo! Gyongz rongzdoq lo!” Daihgya cungj daeuj yawj nauhyied, Cangh Vaj mbouj rox gij yungh’eiq gou, hix buet daeuj yawj. Gou bin hwnj faex bae, aeu gaiq faex he daegdaengq gyongz aen rongzdoq daengz naj Cangh Vaj, hwk dwk de doiq laeng geij yamq. Duzdoq mbin okdaeuj lo, daihgya sikhaek buet deuz lo, Cangh Vaj yawj saehcingz mbouj ndei, hix deuz lo.

Mwh gou cingq daekeiq, raen gyoengqdoq mbin coh gou. Gou gag siengj, duzdoq mbouj ndat gou ne, duzdoq cij ndat boux lwgnyez ndaq vunz. Seizhaenx, duz doq he mbin daengz gwnz naj gou. Gou yawj gij yiengh mbouj doiq, ganjgip buetdeuz. Hoeng gaenq ceiz lo, aennaj gou deng duzdoq ndat song mbat, in dwk gou lienz buet daiq ruenz deuz ma ranz. Daxmeh raen gij yiengh diuqgah gou, sim’in dwk cam: “Mwngz baenzlawz la?” Gou dawz saehcingz goek byai gangj hawj daxmeh dingq, daxmeh daejriu mbouj ndaej, naeuz: “Lwg huk ha, gij vah neix dwg vunzhung hwk lwgnyez gyaez ndaq vunz haenx hane.” Gou dingq le, cij fwt rox lo.

Ginglig gienh saeh neix le, gou rox aen dauhleix “haih vunz doek- laeng dauq haih swhgeij” neix lo.

(seiq nienzgaep Cwnz Mingzcwnz)