“Daegsaek canjnieb ndaej hwngfat, diegbya vut gungz mbouj hojnanz; vut gungz gunggeng yaek saedyienh, vuenh gvanhnen moq baengh yisiz……” 6 nyied 21 hauh, Dwzbauj Yen Majai Cin Gujsou Cunh youq ndaw suen gonengznuengx banh ciengz hoih fwen mbouj doxdoengz he. 8 boux canghfwen ndang daenj buhvaq minzcuz yungh Vahcuengh Dwzbauj ciengq cwngcwz ndei vut gungz, yinx ndaej bak lai boux vunz daeuj dingq fwen.

Fwencuengh Dwzbauj lizsij gyaeraez, yaem’wenq fwen ndei dingq, dwg gij yisuz vwnzva bonjdieg Bouxcuengh aen yienh neix. Bi 2010, fwen Dwzbauj ndaej laebdingh baenz Guengjsae Bouxcuengh Swcigih feihvuzciz vwnzva yizcanj gya’gvangq hanghmoeg. Gaenh geij bi neix daeuj, aen yienh neix cungfaen vatcimh gijndei conzdungj Fwencuengh, dawz Fwencuengh haeuj gyangjsizsoj bae ciengq, dangguh aen caidij youqgaenj hagsib gangj gij cingsaenz baenzdauq gangjvah youqgaenj Siz Ginbingz cungjsuhgi he, doengzseiz hopheux aen cawjdaez hong vut gungz gung- geng seizneix, giethab gij saedsaeh gak yanghcin、 gak mbanj, mbouj- duenh gya’gvangq caeuq gyalai dieg gangj gyangjsizsoj, doenggvaq hoih fwen doenghnaz、 hoih fwen ndaw suen gonengznuengx daengj gij hingzsik vunzlai haengj dingq gyaez yawj haenx, yungh Fwencuengh cienz gak hangh leih beksingq fouq beksingq cwngcwz dangj caeuq guekgya, neiyungz caeuq daezcaiz fwen yied daeuj yied gvangq, yungh fwen gangj gij cingsaenz Siz cungjsuhgi gaenq baenz diuzroen ndei aen yienh neix doidoengh gij cingsaenz caeuq gak loih cwngcwz gaep baihgwnz haeujlaeg simvunz he.

(Lij Suhbingz/李淑萍 Veiz Gvei/韦 桂)