6 nyied 20 hauh, Swcigih Minzyijveij fat goenggauq, bi 2017 Sawcuengh Vahcuengh suijbingz gaujsi dingh youq 7 nyied 30 hauh youq Guengjsae Minzcuz Daihhag banh.

Gaujsi saedhengz doengjit daihgang、 doengjit okdaez、 doengjit habgek biucinj、 doengjit guenjleix saenqsik caeuq doengjit mbawcingq daengjgaep. Gaujsi yungh bizsi hingzsik guh, faen cogaep、 cunggaep、gaugaep 3 aen daengjgaep gaujsi. Gak daengjgaep gaujsi faensoq dwg 100 faen, gaujsi cingzcik 60 faen dwg faensoq habgek, 60 faen doxhwnj 80 faen doxroengz dwg daengj iet, 80 faen(baugvat) doxhwnj dwg daengj gyap. Gaujsi neiyungz baugvat Sawcuengh Vahcuengh yaemvah、 sawloih、 vahfap、 coenz vah、 gap sawloih cauh coenz vah、 yawjdoeg roxyiuj、 fanhoiz(Cuengh hoiz Gun、 Gun hoiz Cuengh) caeuq raiz faenzcieng daengj fuengmienh cihsiz, cujyau dwg gauj gij naengzlig yungh Sawcuengh Vahcuengh bouxgaujsi.

Gaujsi yungh gwnz muengx bauqmingz caeuq daengz dieg bauqmingz 2 loh fuengsik. Danhfanz boux vunz gagnyienh camgya Sawcuengh Vahcuengh suijbingz gaujsi mbouj hanh cizyez、 yozliz、 bi’ndwen daengj, cungj ndaej ciuq bouxvunz saedsaeh aeuyungh gag bauqgauj gvendaengz daengjgaep. Neiyungz ciengzsaeq ndaej hwnj Guengjsae Minzyijveij Vangj(www.gxmyw.com.cn) caeuq Guengjsae Minzcuz Bau Vangj(http://www.gxmzb.net) cazyawj.

(Moz Liujgvei)