Ngoenzhaenx, ndit raeuj rumz liengz, daxboh daiq gou bae lajmbanj mbaet ndaej haujlai byaekcaxcin. Daxboh naeuz louz mbangj he gag gwn, lw roengz haenx heuh gou dawz daengz bakloh cibcih bae gai, dangguh sevei sizcen.

Gou daeujdaengz bakloh henz dan byaek he, youq gwnz dieg bu ndei daehsuliu, baij hwnj byaekcaxcin, couh caj bouxcawx daeuj cawx.

“Dahniq, mwngz dwg baez daih- it gai byaek ba?” Boux daxheiz youq henz gai byaek haenx riunyumj doiq gou naeuz, “gaem gyaekcaxcin baenz- neix iq couh gai 2 maenz, gaem mwngz baenzneix hung, ceiqnoix gai 5 maenz.” Daxheiz dawz gij byaekcaxcin gou cuengq youq gwnz caengh de, youq dauq bingzfaen baez he.

Yaep he, miz boux vunz he cam gou:“Siuj baengzyoux, gij byaek- caxcin neix gaem geijlai cienz?” Gou youh launyaenq youq mbei’iq, yaemh- yaemh ywxywx naeuz:“2 maenz ba……” Daxheiz gai byaek haenx youq henz ciengj dwk naeuz: “Gaem byaek baenzneix hung, gai 3 maenz ngaenz, lwgnyez bin hwnj faex bae mbaet mbouj yungzheih.” Bouxcawx lawq mbat he, naeuz:“Gou 5 maenz cawx song gaem, ndaej mbouj ndaej?” Gou doq ngaek- ngaek gyaeuj. Bit seng’eiq daih’it couh mauhgvaq gij liuhsiengj gou, caeklaiq miz daxheiz gai byaek neix.

Mbwn yied daeuj yied hwngq, byaekcaxcin oiqetet haenx gig vaiq couh reuq lo, boux cawx he yawjyawj le, naeuz mbouj singjsien couh mbouj cawx. Daxheiz naeuz: Mwngz baez wnq daeuj gai byaek, yaek daiq bingz raemx he, gek duenh seizgan he couh bit baez raemx he, byaek couh ndaej baujciz singjsien lo.” Gangj dwk, de daj dan byaek de dawz bingz raemx he daeuj, bang gou bit raemx hawj byaekcaxcin gou. Gou gamjdoengh dwk mbouj rox gangj gijmaz ndei, couh doiq de naeuz: “Mwngz son gou baenzneix lai, couh dang saehfouh gou ba!” Daxheiz angq dwk riu lo.

Daj baezhaenx gvaqlaeng, gou moix ngoenz baehag cuengqhag ginggvaq gizhaenx, cijaeu yawjraen saefouh gai byaek, gou couh gvaqbae dongx de.

(roek nienzgaep Liuz Gyah)