Lwggaeqndaem mbouj miz daxmeh, aenvih de dwg ndaw ciengzciengxgaeq aeu dienh faeg okdaeuj.

Daj ngoenz ciengx hwnj, de couh deng gven youq ndaw loengz- ciengxgaeq, haeux caeuq raemx cungj dwg saicienzsoengq gag soengq daeuj, gwn imq mbouj miz vwndiz. Hoeng, byawz mbouj siengj miz daxmeh gyaezmaij caeuq haeujsim swhgeij ha! Lwggaeqndaem ngoenzngoenz siengj, hwnzhwnz muengh, maqmuengh ndaej ra raen daxmeh de. Ngoenzneix lwggaeqndaem youh cingq siengj: Daxmeh goulau geq lo, dwg mehgaeq bizbodbod? Goulau lij nienzoiq, dwg duz mehgaeqndaem lengj ba? Ei ei, daxmeh, mwngz youq gizlawz? Mwngz itdingh hix cingq niemh gou ba……

Doeklaeng de caen ra daengz aen gihvei ndei ndeu, ndonj ok led, diuq ok ciengzciengxgaeq. Hw, doenghnaz geijlai gvangq, hoengheiq geijlai hom! Lwggaeqndaem angq ndaej vad song aen fwed iq, caen siengj mbin hwnj gwnz mbwn bae.

Byaij mbouj ndaej geijlai gyae, lwggaeqndaem yawjraen miz sam duz lwggaeqraiz cingq youq henz loh vat non. Goulau gyoengqde dwg daeggo roxnaeuz dahcej gou? Ndawsim lwg- gaeqndaem baenzneix siengj couh angqvauvau buet gvaqbae.

Sam duz lwggaeqraiz baez raen daeuj boux hek najseng ndeu, couh “gigi gigi” hemq hwnjdaeuj. Laxlawz neix dwg daxmeh gyoengqde son hawj gyoengqde, eiqsei dwg “Angqcoux, angqcoux, baengzyoux iq!”

Gangj hwnjdaeuj caen mizyinx, gaeqdaxmeh cingq faeg gyaeq, couh “lo lo lo、lo lo lo” dwk son lwggaeq ndaw byuk gangjvah lo. Sam duz lwggaeqraiz neix ok byuk gyaeq le, daxmeh couh ngoenzngoenz son gyoengqde gangjvah, gyoengqde gaenq hag rox haujlai “vahgaeq” lo.

Hoeng lwggaeqndaem mbouj miz daxmeh, mbouj rox gangj hix dingq mbouj rox “vahgaeq”, cijndei ngaez- ngwd dwk muengh sam duz lwg- gaeqraiz neix, ndawsim gig nanzgvaq. De siengj: Ei, danghnaeuz ra daengz daxmeh, de itdingh rox son gou gangj haujlai “vahgaeq”.

“Yawj, de mbouj rox gangjvah, itdingh dwg bouxngoemx.” Duz lwg- gaeqraiz ceiq hung “gigi gigi” dwk hemq.

“Mbouj dwg mbouj dwg, de itdingh mbouj miz daxmeh daeuj son de gangj.” Lingh duz lwggaeqraiz doengzcingz dwk naeuz.

“Daxmeh son raeuz gangjvah, raeuz son de, raeuz guh daxboh daxmeh de, ndei lwi?” Duz gaeq- lwgraiz ceiq iq “gigi” dwk cam.

“Deng, lij son aen bonjsaeh gaeb non daxmeh son hawj raeuz neix hawj de dem. Duzromh gaeb gaeqlwg, gaeqlwg baenzlawz ndoj, aen banhfap neix lwnh de lwi?” Duz gaeqlwgraiz ceiq iq cam dahcej de.

“Dangyienz son lo.” Song dah- cej caez han.

Sam duz lwggaeqraiz hai fwed, angqyangz dwk umj lwggaeqndaem, lwggaeqndaem nyaenx mbouj ndaej doek raemxda lo.

Seizneix, mehgaeq sam duz lwg- gaeqraiz daeuj lo. De dwg duz meh- gaeqraiz, gig lengj.

“Daxmeh! Daxmeh! Mwngz dwg daxmeh gou lwi?” Lwggaeqndaem hainduj gangjvah lo.

Yienznaeuz mehgaeqraiz mbouj rox lwggaeqndaem gangj maz, hoeng raen de baenzneix gikdoengh caemh- caiq youh hojlienz dwk cam, cai daengz de cam maz, couh caenciet dap naeuz:“Dwg, dwg, gou dwg daxmeh mwngz!”

“Hi!” Sam lwggaeqraiz caez hemq hwnjdaeuj:“Dou cungj dwg raiz, de dwg ndaem, baenzlawz dwg beix- nuengx dou?”

“Lwg, gaeq lajmbwn cungj dwg ranz ndeu, youq ndaw lwgda daxmeh, lwgnyez bwn yienghlawz cungj dwg lwg gou.” Mehgaeqraiz gaenjgaenj got lwggaeqndaem youq laj fwed, “lo lo lo” dwk ciengq go hwnjdaeuj.

Doeklaeng, lwggaeqndaem caeuq sam duz lwggaeqraiz ndaej daengz mehgaeqraiz gyaez hoh, gij saedceij gvaq ndaej gig vuenyungz.