Mbanjnazmax dwg mbanj youq henz dah, deng bo heu humxrumj. Gizneix gyoengq bo humxheux raemxdah, raemxdah dauqngaeuz gyoengq bo, gij yingjfanj gyoengq bo dieggyae youq raemxdah saw engq heuswd, lwgbit iq ndaw dah cingq angqyangz dwk youz bae youz dauq, raemxdah dieggyawj gaeuznyeu dwk veizhumx youq naj mbanj, caen dwg “fwj miz saek ndoeng vang ndongj namz, raemx daiq hing dah gvaq bo baek”. Mbanjnazmax youq doenghnaz hung ndeu caeuq gyoengq bo daengh lajde, daengx mbanj yawj hwnjdaeuj baenzneix gyaeundei.

Mbanjnazmax miz haj goengq bo miz heiqlingz, geij goengq bo neix faen youq baihdoengnamz、baihnamz、baihsaenamz、baihgyang caeuq baih- laeng. Vunzmbanj yaek gvaq maz ciet couh rox hwnj goengq bo doiqwngq bae hoh.

Gwnz byongh bo saenamz miz aen mboq ndeu, vunzlai heuhguh “Bakmboq”. Gaxgonq henz Bakmboq miz geij go faexraq laux, ndaej cien lai bi lo. Go ceiq hung daengx go cizging miz baenz 3 mij, miz 60 lai mij sang, mbaw baenz nga maengh. Raemxmboq sawrad ndaej yawjraen daengz daej, gwnz raemx ronghyapyap, raemx gig ndei caemhcaiq raemx mbwnj ok youh lai, gij raemx neix aeu bae laeh naz, lij gung hawj vunz geij aen mbanj gwn caeuq yungh.

Sigij gonq 90 nienzdaih, vih bae- dauq fuengbienh, cek aen giuzfaex gaeuq naj mbanj bae, yaek guh aen giuzgang. Vunzlai couh raemj geij go faexraq laux bae gai aeu ngaenz guh giuzgang. Daj raemj geij go faexraq laux bae le, raemxmboq couh gwq mbwnj gwq noix. Doeklaeng raemx Bakmboq caiq hix gung mbouj hawj baenzlai vunz gwn caeuq yungh lo. Riuznaeuz gyangngoenz miz bitgim youq Bakmboq youz, gyanghaemh bitgim couh youq laj faexraq laux ninz. Raemj faexraq laux bae, bitgim mbouj miz ranz ndoj, couh deng vunz fatyienh caeg bae lo. Bitgim neix dwg doxgaiq bouxsien, rox hawj raemx mbwnj ok. Mbouj miz de congh Bakmboq dangyienz couh mbouj rox ok raemx lo, raemxmboq couh yied daeuj yied noix.

Moix bi gvaq cieng le, mbwn sauj mbouj miz fwn doek seiz, saekseiz Bakmboq di raemx hix mbouj mbwnj lo. Aenvih mbouj miz geijlai raemx bae laeh naz, gij naz cungj bienqbaenz reih, haeuxnaz hix ndaem mbouj baenz, cijndaej ndaem haeuxdaeq roxnaeuz haeuxmienh daengj gij gomiuz mbouj aeu baenzlai raemx. Baezlaeng, bi soucingz hix mbouj ndei, gij ndwenngoenz vunzmbanj hix baenzhoj baenznanz.

Naj Mbanjnazmax 100 mij, miz diuz dah ndeu daj baihsae lae coh baihdoeng, raemxdah sawngeuz, ndigah vunzmbanj heuh dah neix guh “Dahraemxsaw”. Dah neix dwg dahnga Gyanghraemxsaw, goekraemx de youq giz liz miz saek 33 goengleix.

Ciuhgeq, vunzmbanj vih bienh bae bangxdah baihbaek guh hong, couh youq gwnz Dahraemxsaw guh aen giuz faex ndeu. Aen giuz faex neix dwg vunzmbanj hwnj byalaeng bae raemj faex laux daeuj guh, aen giuz neix raez saek 30 mij, gvangq saek 2 mij. Gyaeuj giuz dep mbanj baihneix lij guh aen diengz hawj vunz naengh, vunzmbanj heuh de guh “Haenz- camh”. Gaxgonq dwg hawj vunz bae naz guh hong dauq naengh yaep ndeu caiq ma ranz, doeklaeng couh bienqbaenz vunzmbanj mwh hoengq hix daeuj gizneix youqliengz、gangjgoj. Giuzfaex laux neix miz geij bak bi lo. Youq geij bak bi doekgonq, couh miz aen gvenq ndeu: Vunz daengx mbanj daengz yaek bae sou haeux seiz couh coih aen giuz neix baez ndeu, mienxcij sou haeux seiz gyoengqvunz baebae dauqdauq daiqlai, giuz deng raek mbouj youqgaenj, lau vunz deng sieng. Giuz deng duenh caezgya ok ngaenz caiq coih roxnaeuz guh aen moq cungj baenz, ndang vunz youh mbouj dwg gizlawz deng sieng cungj yw ndaej ndei. Geij bak bi daeuj, ciuh swnj ciuh, itcig baenzneix guh.

Mbanjnazmax bo heu raemx saw, hawj gyoengqvunz youq dieg neix anningz dwk gvaq saedceij, ce miz haujlai cienznaeuz geizheih. Muengh doeklaeng Mbanjnazmax gung ok vunzcaiz engq lai, Mbanjnazmax goj cauh ndaej engq ndei!