Aeu ndaej caenging le, Vugungh ma daengz Vahgojsan gvaq gij saedceij cwxcaih de. Seizgan nanz le, de couh miz di mbwq lo, de couh iek Sahcwngh bae yawj Batgaiq.

Batgaiq yiedcingz cingj song boux de bae bouqlaeuj gwnngaiz. Gwn sat le, fuzvuyenz dawz mbaw dan cienzngaiz 250 maenz he daeuj. Vugungh naeuz:“Batgaiq, vaiq gyau cienz.” Mbouj siengj daengz Batgaiq naeuz:“Raeuz lijdwg bingzdan ba.” Vugungh riu naeuz:“Mwngz boux vunzhuk neix, mwngz cungj mbouj gaij gij maetmi mwngz bae saek di. Ndei, bingzdan couh bingzdan.” Yienghneix, sam vunz gak dawz mbaw cienz 100 maenz he bawj fuzvuyenz.

Fuzvuyenz cauj cienz hawj gyoengqde 5 mbaw 10 maenz. Vugungh dawz ok 20 maenz, guh cienzsinhoj hawj fuzvuyenz. Lw roengz 30 maenz gyoengqde moix vunz aeu 10 maenz.

Batgaiq damz naeuz:“Golingz, mwngz caen daihfueng, aeu gij cienz raeuz baen hawj fuzvuyenz, gij cienz gou ra ndaej mbouj yungzheih bw……”

Vugungh yawjraen Batgaiq gij yiengh mbouj haengjheiq saekdi, couh naeuz:“Gou ok diuz daez he gaujgauj mwngz, dangh- naeuz mwngz dap ndaej deng, gou couh aeu 10 maenz cienz gou hawj mwngz.” Batgaiq naeuz: “Gauj couh gauj, mienxndaej naeuz gou beg aeu cienz mwngz.”

Vugungh naeuz: “Couh aeu raeuz gwn haeux gienh saeh neix guh daez ba. Raeuz sam vunz dawz ok 300 maenz, saedsaeh cauj ma 30 maenz, moix vunz aeu 10 maenz. Yienghneix, raeuz moix vunz ok 90 maenz, gyahwnj hawj 20 maenz cienzsinhoj hawj fuzvuyenz, itgungh dwg 90×3+20=290(maenz). Lij miz 10 maenz bae gizlawz lone?”

Batgaiq naemj bae naemj dauq hix naemj mbouj doeng 10 maenz cienz dauqdaej bae gizlawz, de couh naeuz dwg fuzvuyenz yaem bae lo.

Sahcwngh youq henz goemq bak riu dwk. Batgaiq naeuz: “Raeuz deng vunz ciemq bienz- ngeiz lo, mwngz lij miz sim riu!”

Sahcwngh naeuz: “Golingz daegdaengq ok daez loek daeuj gauj mwngz, hawj mwngz siengj gvaq vang bae. Saedsaeh diuz daez neix gig genjdanh, raeuz sam vunz ok 270 maenz cienz, ndawde 250 maenz dwg cienz ngaiz, fuzvuyenz ndaej 20 maenz.”

Batgaiq bek aen’gyaeuj de naeuz: “Hai, aen uk gou couh dwg cienq mbouj gvaq van daeuj……”

(Vangz Gveisangh)