Youq Cungzcoj Si Dasinh Yen haujlai deihfueng, moix bi daengz liggaeuq loeg nyied coloeg ranzranz guh haeuxnaengj, gaj bit gaj gaeq daeuj baiq cwzvaiz, aenvih ngoenzhaenx dwg ciet- hoenzcwzvaiz.

Cienz gangj, youq ciuhlaux miz bi ndeu seizhah, mbwn daegbied hwngq. Miz boux caizcawj ndeu bik bouxguhnaz youq laj nditndat yien vaiz bae cae naz, duzvaiz daengx ngoenz cae naz mbouj ndaej gwn nywj yietnaiq, duzduz cungj deng byom liux. Caizcawj mboujguenj duzvaiz dailix, laebdaeb bik bouxguhnaz yien vaiz bae cae naz, hawj duzvaiz byom dai baeg dai, baenzbingh dai bae. Daengx mbanj cij lw geij duz vaiz geq caeuq song duz vaizlwg gwn cij haenx. Song duz vaizlwg neix daengx ngoenz swenjhemq gwn cij, hoeng duz vaiz geq gyang- ngoenz deng bik bae cae naz， mbouj ndaej gueng gyoengqde. Vaizlwg swenjhemq, gingdoengh sien gwnzmbwn, bouxsien roengz- daeuj daiq vaizgeq caeuq vaizlwg haeuj luegbya ndaw mieng bae, mbouj hawj gyoengqde caiq deng caizcawj bikhaih. Mbwn yaek laep lo, vunz ndaw mbanj mbouj raen vaiz dauqma, gig sim gip, dauqcawq bae ra cungj ra mbouj raen. Ngoenzdaihngeih banhaet, ranzranz guh haeuxnaengj, gaj bit gaj gaeq, daengz henz naz caeuq dinbya bae ra vaiz caeuq gouz bouxsien, baujyouh duzvaiz ndaej bingzan dauqma. Daengz gyang- hwnz, vaiz caen dauqma lo, moix duz vaiz cungj bienq ndaej biz- bwdbwd.

Ngoenzhaenx cingq dwg loeg nyied coloeg. Daj ngoenz haenx hwnj, gyoengqvunz couh dingh ngoenzneix guh ciethoenzcwzvaiz, itcig riuzcienz daengz seizneix.