Daxmeh naeuz, gij yienzfaenh de dwg goenglungz gou soengq hawj.

Daxmeh mbouj dwg seng youq ranz mizmingz, hoeng ranz daiq gou hix dwg ranz hung lo. De caet bet bi seiz, ndawranz comz miz haujlai daeg beixnuengx dangz, cukcuk haj roek- cib vunz, gyoengqde lij iq, couh cingj sienseng daeuj son gyoengqde. Boux sienseng haenx couhdwg goenglungz gou. Goenglungz gaiqgaiq cungj rox, gig yunghsim son hagseng.

Gaxgonq sevei gaeuq cungh lwgsai, lwgsai dij lwgmbwk cienh, lwgmbwk itbuen mbouj ndaej hwnj hagdangz. Daxmeh gou lij iq, moix baez gyoengq hagseng hwnjdangz, de cungj gyaez boemz youq rog cueng caegcaeg dingq sienseng gangj. Goenglungz caeux couh raen lo, hoeng de coengzlaiz mbouj laengz.

Daxmeh 10 bi seiz, goenglungz naeuz swhgeij nienzgeij laux ndang- daej nyieg, mbouj miz rengz bae son hagseng lo, siengj doiq ma ranz. Doeklaeng de ra daengz goengda gou, daez ok aen cingjgouz ndeu:“Gou gaenq laux, gijmaz hix mbouj siengj lo, dan siengj daiq dah lwgmbwk mwngz baema guh bawxlan gou.”

Goengda gig gingq goenglungz, hoeng de lijdwg vah’unq doi naeuz:“Dahlwg iq lai, mbouj ndaej liz ranz. Yienghneix ba, gou lai gya di ngaenz hawj sienseng.”

Goenglungz naeuz:“Gou son baenz seiqvunz saw, hagseng rim lajmbwn, hix mbouj noix ngaenz yungh, couh siengj daiq dah lwgmbwk gvai mwngz baema, guh bawxlan ranz gou. Ngoenzneix mwngz mbouj dapwngq, ngoenzlaeng gou caiq daeuj.”

Couh yienghneix, goenglungz genhciz deq, doeng gvaq cin daeuj, nit bae hwngq ma, cingjcingj gouz le haj bi, doeklaeng youq daxmeh 15 bi seiz, goenglungz dauqdaej gangjfug goengda, doengzeiq daxmeh haq hawj daxboh gou lo.