5 nyied 1 hauh, 2000 lai boux beixnuengx Myauzcuz Nanzdanh Yen ndang daenj buhvaq moqsag youq Vwnzva Gvangjcangz aen yienh neix doxcomz gvaq ciet ndei, angqcoux “ndwenseiq cobet” ciet conzdungj minzcuz, doengzcaez angq gvaq ciet guhhong “haj it”.

Hozdung ngoenzhaenx, banh le caeqbaiq yinghyungz Myauzcuz、 caeq coj yizsi; Nanzdanh Myauzcuz Doih- fouxgyong’va biujyienj le 《Gyong Raemjfaex》《Gyong Fungsou》《Gyong Angqhoh》《Myauzcuz Gyaeundei》 daengj diuqfoux ndei; hozdung lij miz siujcuj ciengq、 gagciengq、 saimbwk doiq ciengq daengj biujyienj lai cungj lai yiengh dem, ndaej daengz gyoengq beixnuengx Myauzcuz yienhciengz bekfwngz haenhndei.

Ciuq cam rox, baez hozdung neix dwg aen hozdung ndawbiengz youz Nanzdanh Myauzcuz Yozvei cujciz, vih beixnuengx Myauzcuz daezhawj aen bingzdaiz doxgyau、 dox baedauq、 doxyungz ndei he, gyalaeg le gaeu- doeng， gyaak le gij yisiz beixnuengx Myauzcuz minzcuz doxgiet、 gyaez dangj gyaez guek gyaez ranz, daezsang minzcuz gagsaenq, gikfat gij yiedcingz doengzcaez hwnjguh guekgya caeuq mbanjranz gyoengqde.

(Yangz Caijyenz/杨彩元)