4 nyied 23 hauh, Dwzbauj Yen “2017 nienz Cuengh Gun song vah saw sonhag yenzdauj hozdung” youq Duh’anh Yangh Cungsim Siujyoz banh, baez hozdung neix youz Yen Gyauzyuzgiz cawjbanh, Yen Saw- cuengh Hagdangz bangbanh. Camgya baez hozdung neix miz gyoengq lauxsae 7 aen Cuengh Gun song vah saw hagdangz caeuq 2 aen hagdangz yaek guhbaenz Cuengh Gun song vah saw hagdangz aen yienh neix, lij miz gyoengq lauxsae daj Cingsih、 Bingzgoj、 Nazboh daengj yienh si daeuj haenx, gungh 136 boux.

Hozdung yungh gij hingzsik yienhciengz yawjhag nem yenzdauj guh. Ngoenzhaenx, gyoengqvunz camgya hozdung haenx yawjngonz le diuq fouxsaux、 ringx gengxdiet、 bau aendomq caeuq Heiqcuengh Namzloh daengj minzcuz vwnzva swnjcienz hanghmoeg gig miz daegsaek deih- fueng naekna haenx, lij yawjhag le Duh’anh Yangh Cungsim Youwzyenz Dangz Munglanz lauxsae hwnjdangz son hagseng “at aet et” geij cih yinhmeh neix caeuq Duh’anh Yangh Cungsim Siujyoz Danz Fungbingz lauxsae hwnjdangz ngeih nienzgaep 《Gou Senj Gou》, goqdangz sonhag dajveh giujmiuq moqsag, sonhag fuengfap sengdoengh lingzvued, gikfat gij hagsib yinxdaeuz naekna hagseng, aeundaej le gij sonhag yaugoj ndei.

Yenzdauj doxgyau vanzcez, gak hagdangz lauxsae daiqbiuj guh dox- gyau, gangj gij siengjfap bonjfaenh, gangj daengz gij vwndiz saedsaeh sonhag bungzdaengz haenx, caezgya doengzcaez doxyaeng, doengzcaez ra gij roen sonhag caeuq fuengfap mizyauq. Doenggvaq yawjhag、 yenz- dauj, dap aen bingzdaiz doxgyau ndei ndeu hawj gyoengq lauxsae, gyaak Cuengh Gun song vah saw hagdangz doxgyau, doiq saedyienh swhyenz ndei caezyiengj miz leih, coicaenh lauxsae doengzcaez hwngfat.

(Nungz Yimeiz/农玉梅 Nungz Denhsiengz/农天祥)