Lij Siunen, Lingzyinz Yen Sahlij Yauzcuz Yangh Gojbuj Cunh dangj- cihbu suhgi, bi 1998 gyahaeuj Cungguek Gungcanjdangj, bi 1991 daengz neix gonqlaeng dang cunh- veijvei funij cujyin、 cunhminzveij cujyin caeuq cihbu suhgi. 20 lai bi daeuj, de daiq beixnuengx Yauzcuz byaij hwnj diuz roen daegsaek vut gungz baenz fouq he.

Gojbuj Cunh bya ndoi cungj dwg namh biz, de cungfaen yungh gijndei swhyenz dienheiq caeuq diegnamh dangdieg, fatdoengh vunzlai haifwz, dawz ndoifwz Gojbuj Cunh cungj ndaem batgak、 youzcaz、 faex- samoeg、 makgyaeuq daengj faex ginghci. Seizneix, aen cunh neix miz batgak mienhcik 10000 moux、 youzcaz 8000 lai moux.

De dangguh yienh、 si yinzda daiqbiuj, seizseiz vih vunzmbanj naemj, raiz daezanq, lienzhaeh mizgven danhvei ceng’aeu ngaenz- cienz bu roensuijniz ndaw mbanj. Seizneix, Gojbuj Cunh 13 aen mbanj swyenz miz 9 aen gaenq doeng roensuijniz, 4 aen mbanj swyenz roensuijniz cingq hwnjguh, ceng’aeu bineix ndaej mbanjmbanj doeng roensuijniz.

Lanzdenyauz aen yienh neix miz gij fungsug conzdungj yungh banj- lanzgwnh guhbaenz romj、 nyumx baengz guh baengzdoj gyagoeng ndangdaenj minzcuz. 20 lai bi daeuj, Lij Siunen swnjcienz faenh dinfwngz conzdungj minzcuz neix, de yawj ndei hawciengz, daiq mehmbwk ndaw mbanj youq henz rij、 ndaw ndoeng ndaem haujlai banjlanzgwnh, dung- yenz mehmbwk vat daemz cimq banjlanzgwnh guh romj, yungh romj nyumx baengz, dawz baengz roxnaeuz guhbaenz ndangdaenj Yauzcuz bae gwnz haw gai. “Baengzdoj caeuq ndangdaenj minzcuz gyoengq mehmbwk ndaw mbanj dou guh okdaeuj haenx dinfwngz ndei、 baengz ndei、 saek gyaeu, ndaejdaengz vunz- lai Yauzcuz yienh gih henzgyawj haengjgyaez, miz mbangj lij dingq aen mingz ndei neix daeuj ndaw mbanj dingh guh senj cawx, doxgaiq ndei gai, mehmbwk ndaw mbanj baengh hangh neix youq ranz guh hong bi ndeu hix ndaej canh 2 fanh maenz doxhwnj.” Lij Siunen angqyangz naeuz.

Gojbuj Cunh ndaejdaengz Lij Siunen daiqlingx, youz mbanjgungzhoj gaxgonq gaenq bienqbaenz mbanj- baenzmiz Yauzcuz daengx yienh mizmingz. De gonqlaeng ndaej bingz baenz yienh、 si gaep “gungcanj- dangjyenz maenhndei”“bouxguhhong senhcin mehmbwk”“yinzda daiqbiuj cib ndei” nem swcigih、 guekgya gaep “sam bet hungzgizsouj” daengj.