“Veicangj eu fwen Ouh Liz- cungh, guh hong vwnzva dwk cungfung, gyaez eu Fwencuengh banh hoihfwen, swnjcienz Fwencuengh laeb daengjdaeuz.” Youq Siengcouh Yen, gyoengqvunz baenzneix ciengq Ouh Lizcungh veicangj fwen hezvei aen yienh neix. Baeznaengz ndaw yienh banh hoihfwen, cungj raen Ouh Lizcungh nyaengqnywtnywt, de boux veicangj fwen hezvei neix, vih aeu fwen Mbanjcuengh fatyiengz ndei, de samcib bi dangq ngoenz he guh ndei faenh hong neix.

Ouh Lizcungh doekseng youq Siengcouh yienhsingz, daj iq gyaez sij faenzcieng caeuq soucomz fwen. Doeg cuhcungh seiz, ndaejdaengz cangh- heiq ndawbiengz Siengcouh Yen yingjyangj hainduj soucomz fwen dangdieg, “vwnzgwz” geizlaeng de daengz lajmbanj capdoih, dingqnyi bouxgeq lajmbanj yungh Vahcuengh eu fwen seiz, de couh laeglemx geiq roengzdaeuj. Camgya guhhong le, daegbied dwg dangnyaemh Yin- gyangh Cin senhconz gansw caeuq biensij cinceiq seiz, de ndaej roengz mbanj soucomz swhliu engq lai, seizhaenx couh daengz ranz canghfwen fwngz cau 3 bonj Fwencuengh. Bi 1988 de diuh bae yienh vwnzva’gvanj le, fucwz biensij 《Fwenhaij Lungzdanz》 caeuq 《Fwen Comz Siengcouh》 song bouh saw neix, daj seizhaenx hainduj de roxyiuj canghfwen Fwencuengh Siengcouh engq lai. Aenvih de biensij 2 bouh fwen comz neix cingzcik yienhda, ndaej Swcigih Vwnzvadingh bingz baenz bouxvunz senhcin. Bi 2005, Siengcouh Yen laebbaenz fwen hezvei, aenvih Ouh Lizcungh ndiepgyaez fwen, rox bien youh rox sij fwen, ndigah ndaej dang veicangj. Fwen hezvei dwg aen cujciz ndawbiengz he, mbouj ndaej saek faen ngaenz, hoeng Ouh Lizcungh mbouj suenqsoq. Vih caepcawq hoihfwen, de bae ra dangjveij cwngfuj, ra boux miz ngaenzcienz ok cienz ok rengz, banh ndei hoihfwen. Bi 2005 daengz seizneix, de cujciz banh hoihfwen 100 lai ciengz, bang yenveij、 yen cwngfuj banh hoihfwen 10 lai baez. Doengzseiz, de yungh seizhoengq cauxsij fwen, ndaej senj dang veicangj fwen hezvei doxdaeuj gij fwen de cauxsij haenx ndaej ciengj si gaep doxhwnj 10 lai baez. De lij lai baez guh bingzveij fwen dem, vih Fwencuengh Siengcouh Yen hwngfat roengz sim ok rengz.

Bi 2005 doxdaeuj, Ouh Lizcungh nyinhcaen guh ndei hong swnjcienz caeuq hwngfat Fwencuengh Majbingz. Bi 2005 daengz seizneix, youq Majbingz Yangh banh hoihfwen Fwencuengh 20 lai ciengz, soucomz Fwencuengh 7000 lai hot, bae cunz canghfwen Fwencuengh caeuq boux- swnjcienz 40 lai boux, sij lunvwnz mizgven Fwencuengh 5 bien. Bang Guengjsae Densidaiz、 Guengjsae Yinzminz Gvangjbo Dendaiz daengz Siengcouh loegguh benqciendaez Fwencuengh. Ouh Lizcungh lij caeuq vwnzva’gvanj aen yienh neix doengz- caez roengzrengz doidoengh, hawj Fwencuengh Siengcouh youq bi 2008 ndaej liedhaeuj swcigih gaep feihvuzciz vwnzva yizcanj mingzloeg. Bi 2013, vih dajcauh vwnzva Fwencuengh Siengcouh, bauq Maj- bingz Yangh baenz “aenmbanj Fwencuengh Guengjsae”, de sij gak cungj caizliuh, cingjleix mizgven dangjan caizliuh, dingh guhhong fueng’anq, maeuzveh gizdieg swnj- cienz Fwencuengh, vih Majbingz Yangh ndaej aen cwngheuh “aenmbanj Fwencuengh Guengjsae” guh ok gungyen hungloet. Doengzseiz, de lij gungganq le buek canghfwen Fwencuengh he, aeu canghfwen rox ciengq Fwencuengh soengq hawj mizgven bumwnz son’gyauq, youq de doigawj caeuq son’gyauq lajde, Majbingz Yangh ok le boux fwen- vuengz Fwencuengh swcigih gaep ndeu, boux bouxswnjcienz Fwen- cuengh ndeu, 4 boux canghfwen Fwencuengh si gaep.

Aenvih Ouh Lizcungh nyinhcaen guh ndei hong fwen hezvei, gaenxmaenx roengz sim banh gak cungj hoihfwen, son’gyauq haujlai canghfwen Fwencuengh, gaenxmaenx cauxsij fwen, sij lunvwnz comz fwen, youq guenjleix caeuq cauxsij song fuengmienh guh ok gungyen yienhda, de ndaej bingz baenz “fwenvuengz mingzdaeuz Guengjsae”.