Daj it nienzgaep daengz roek nienzgaep, son yijvwnz ban dou cungj dwg Veiz lauxsae. Veiz lauxsae youq ndaw hagdangz son saw gaenq miz 20 lai bi lo. De son saw gig miz gingniemh, gangj goq seiz gij sing de youh cingcuj youh ndei dingq, dou cungj gig gyaez de.

Veiz lauxsae miz di gujgvaiq, de gingciengz byaujyangz gyoengq doengzhag, hoeng, Dwng Ginhbangj doengzhag dauq gingciengz deng de baebingz. Aenvih Dwng Ginhbangj gig coengmingz, hoeng guh gijmaz saeh cungj dwg lujluj lajlaj, cingzcik de hix hwnjroengz mbouj dingh.

Geiq ndaej miz baez ndeu ngamq haihag mbouj geij nanz, gyoengq doengzhag lij caengz ndaej dawz sim cuengq youq gwnz hagsib bae. Veiz lauxsae naeuz: “Seizneix gaenq hwnj aen danyienz ndeu sat lo, gou caeuq sou dajdoj, dangh- naeuz raeuz seizneix sikhaek cwzyen, sou itdingh mbouj miz saek boux ndaej habgek.” Dwng Ginhbangj couh naeuz: “Lauxsae, gou mbouj saenq!” Veiz lauxsae naeuz: “Boux lawz gou cungj ndaej saenq, hoeng gou cix mbouj saenq mwngz.” Dwng Ginhbangj naj cungj hoengz liux, mbouj ndei eiqseiq dwk naengh roengzdaeuj. Baez cwzyen haenx, daengx ban doengzhag cungj ndaej habgek, Dwng Ginhbangj hix ndaej 75 faen. Seizneix siengjsiengj, yienzlaiz Veiz lauxsae dwg yungh fap gik vunz ya.

Geizgyang gaujsi aen singhgiz gonq, Veiz lauxsae youh heuh moix boux doengzhag dingh aen muzbyauh ndeu. Dou moix boux cungj dingh ndei muzbyauh lo, Dwng Ginhbangj hix dingh le 80 faen muzbyauh. Veiz lauxsae dingq le naeuz:“Dwng Ginhbangj, muz- byauh mwngz dingh ndaej daiq sang lo, mbouj hojnaengz ndaej saedyienh, lij dwg 60 faen ba.” Dwng Ginhbangj mbouj guh sing, daengxnaj nding’yan.

Geizgyang gaujsi le, gyoengq- dou cungj simgip dwk caj gunghbu cingzcik. Dang cingzcik gunghbu seiz, dou cungj ngawh lo, Dwng Ginhbangj gingciengz deng lauxsae dajgik haenx gingqyienz gauj ndaej 96 faen.

O, seizneix gou rox lo, neix dwg lauxsae gaengawq gij daeg- diemj Dwng Ginbangj miz di siuj coengmingz, danhseih mbouj gaeuq dabsaed, youh mbouj fug saw, cij sawjyungh gij fuengfap gik de haenx. Lauxsae ciengzciengz dajgik de, hawj de gaij bae haujlai sibgvenq mbouj ndei, cingzcik dauqdaej miz haujlai cinbu lo.

Veiz lauxsae yienznaeuz miz di gujgvaiq, hoeng gou gyaez de.

（指导老师：韦凤玲）