Miz baez ndeu, gaujsi gonq lauxsae naeuz:“Daengzcog yaek gauj Yinghyij.” Gou dingq le, mbouj dawz vah lauxsae haeuj rwz. Neix dwg gauj Yinghyij gou ceiq sug haenx, moix baez gaujsi cingzcik gou cungj dwg 95 faen doxhwnj ! Gou dawz gij vah lauxsae cungj vut daengz laeng uk bae lo.

Mwh gaujsi, gou gaemdawz sigienj, gig vaiq yawj mbat ndeu,daiq yungzheih lo! Gou ndawsim gag angq. Gou ganjgip gaem bit dap daez. “Dai lo!” Miz diuz daez he gou gaenbonj mbouj raen gvaq, faensoq gingqyienz dwg 5 faen! Gou yawj soujbyauj mbat he, simvueng lo, lij miz 5 faen cung couh gyau gienj, gaenq miz doengzhag hainduj genj- caz sigienj lo. Doengzdaiz gou gaenq guh sat lo, cijaeu gou nod aen’eij di he, couh yawj ndaej raen gij dapanq de. Seizneix lauxsae mbouj haeujsim daengz gou, gou cingq simvueng seiz roxnyinh yawjraen le maqmuengh, hoeng couh youq seizneix, youq ndaw uk gou miz song cungj singyaem:“Cau ba, yienghneix mwngz couh gauj ndaej muenxfaen, mwngz lumz luma? Daxmeh gangj muenxfaen miz ciengj bw.” Lingh aen singyaem naeuz: “Mbouj ndaej cau! Gaujsi dwg genjcaz mwngz bingzseiz hagsib hag ndaej baenzlawz yiengh, mbouj ndaej vihliux faensoq, yaeuh vunz youh yaeuh swhgeij! Mwngz cijaeu gauj ok gij cingzcik caensaed couh ndaej lo!” Sim gou fugfeb hwnjroengz, song cungj singyaem youq ndaw uk ceng mbouj dingz. “Ling ……ling……ling” Lingz gyau gienj yiengj lo, gou lij caengz dap daez sat couh dawz sigienj gyau hwnjbae, gou lumj cuengq roengz rap naek nei cuengq gaemz heiq hung ndeu.

Gvaq le geij ngoenz, dan cingzcik fat roengzdaeuj lo, caeuq gou liuh haenx ityiengh, 95 faen. Daxmeh dingq gou gangj sat gij ginglig mwh gaujsi, haenh gou guh ndaej deng, gou sou ndaej le binjdwz lauxsaed, hix mingzbeg le cijaeu nyinhcaen hagsib, couh ndaejdaengz cingzcik ndei.（指导老师：庾书扬）