Lauxsae gingqgyaez:

Mwngzndei!

Dou couh yaek bizyez lo, couh yaek biek mwngz bae lo. Ndawsim gou miz haujlai vah singj doiq mwngz gangj.

Lauxsae, mwngz daj it nienz- gaep son gou daengz roek nienzgaep, moix ngoenz mwngz youq gwnz hwzbanj sij gij cih cingjcaez ndeiyawj, gij sing sij cih haenx hix gig ndei dingq, gij singyaem haenx mbouj dwg fwndoek yiengj “ba ba”, hix mbouj dwg rumz bongj mbawfaex yiengj “sa sa”, dwg gij sing unqswnh caenciet doiq dou. Lauxsae, mwngz moix ngoenz baegaij cozyez dou, youq gwnz cozyez dou louz roengz gij ngaeuhoengz, cahoengz roxnaeuz gienhoengz, baihndaw hamz miz gij simgei cinglig mwngz, haenx couh dwg gij gyaez mwngz doiq dou.

Lauxsae, mwngz vih dou hwnz- ngoenz sinhoj, moixngoenz mbwn ngamq rongh, mwngz couh hwnq- daeuj caeuq dou itheij baet hag- dangz. Aenvih hagdangz raeuz gig gvangq, mwngz lau dou baet mbouj liux mbouj miz seizgan doeg saw, moix ngoenz cungj caenndang daeuj caeuq dou guhdoih baet, daengx aen hagdangz mbouj miz boux lauxsae lawz lumj mwngz yienghneix. Cingq dwg mwngz guh yienghndei hawj dou, dou hix bienq ndaej engq gaenx lo.

Lauxsae, gou ciengzseiz yawj- raen mwngz daj ndaw ranz mwngz dawz gij cozyez dou roxnaeuz gobwnj byaij haeuj bangunghsiz, gou naemj: Mwngz itdingh dwg yungh gij seiz- gan yietnaiq mwngz daeuj gyaban ba. Lauxsae, mwngz vih dou sinhoj lai lo, gvaiq mbouj ndaej mwngz lij caengz daengz 40 bi byoem couh hau haujlai lo. Lauxsae, mwngz aeu haeujsim ndangdaej mwngz bw.

Nyienh mwngz ndangcangq, angqyangz!

Hagseng mwngz: Veiz Danhmeiz

2016 nienz 10 nyied 10 hauh

（指导老师：韦凤玲）