●Gaenh bi neix daeuj, Denzyangz Yen mboujduenh gyagiengz hwnjguh swnghdai lajmbanj, haenqrengz saed- hengz cunghab cingjceih vanz- ging lajmbanj, haenqrengz gaij- ndei yienghsiengq vanzging swnghdai lajmbanj, gvangq- langh haiguh cauxlaeb mbanj swnghdai hozdung, yienh’ok buek mbanj “swnghdai ndei、 vanzging gyaeundei” he. Daengz seizneix, aen yienh neix gungh cauxlaeb mbanj swnghdai si gaep doxhwnj 46 aen, ndawde mbanj swnghdai swcigih gaep 26 aen.

(Moz Youjhoz Cau Yuj- siengz)

●Gaenh bi neix daeuj, vunzmbanj Mbanjcuzfung Liengzfungh Cunh Vadung Cin Cingsih Si dawz fiengz haeuxnaz guh baenz sauqbaet iq gai, cungj sauqbaet neix ndaej baet dieg cienmeng、 diegbenjfaex、 gwnz- ciengz daengj, hawj diegranz baet ndaej gig ronghndongq, dwg gij doxgaiq vanzbauj biucinj, ndaej daengz siminz haengjgyaez.

（Vangz Anhcungh）

●4 nyied 14 hauh, Lungz- swng Gak Cuz Swciyen cujciz boux gisuz yinzyenz ndaem caz daengz Majdiz Yangh Lijsi Cunh, yienhciengz son’gyauq vunzmbanj dangdieg ndaem caz. Vih hawj ranzgungzhoj vaiqdi vut gungz, aen yienh neix gaenxmaenx cujciz laux- hangz bae daengz ndaw reih ndaw naz, soengq cihsiz、 soengq dinfwngz bae hawj vunzlai, muzdiz hawj ranzgungzhoj doenggvaq hwngfat canjnieb saedyienh vut gungz baenz miz.

(Banh Cisiengz)

●4 nyied 14 hauh, Hocouh Si Veiswngh Giswnghveij cujciz gihgvanh dangjyenz ganbu daengz dieggaeuq Cunghgung Guengjsae Sengj Gunghveij youq Cauhbingz Yen Vangzyauz Cin haenx, haiguh gwzming conz- dungj gyauyuz caeuq gyaez- guek cujyi gyauyuz hozdung. Doenggvaq dauqcunz dieggaeuq gwzming, dauq hag vahmieng haeuj dangj, siengjniemh gwz- ming senhlez, saeddieg roxnyinh gij haenqguh ginglig、 gij cingz gig sang gig ndei caeuq gij cozfungh ndei gwzming senhlez.

(Liz Cujdez)