3 nyied 29 hauh, vih angqhoh ciet “sam nyied sam”Bouxcuengh neix, Sangswh Yen Swhyangz Cin Gyanghbingz Cunh Siujyoz baez daih’it banh baenz “sam nyied sam” vwnzva Bouxcuengh vwnzyi langhyienj.

Mbat hozdung neix aeu 14 aen cezmuz youz 6 aen daegsaek seqduenz vwnzva Bouxcuengh ndaw hag bienhbaiz biujyienj, cezmuz cujyau hingzsik miz minzcuz yinhyoz、minzcuz vujdauj、minzcuz dijyuz daengj. Hozdung neiyungz lij miz meijgungh、suhfaz langhbaij caeuq cimz haeuxnaengj dem, nauhyed raixcaix.

Sangswh Yen Swhyangz Cin Gyangh- bingz Cunh Siujyoz dwg aen hag Cuengh Gun song saw vah sonhag sawqniemh hagdangz he. Vih coengh lauxsae son ndei hagseng hag ndei, mboujduenh daezsang gij gyacizgvanh、sigaigvanh、simjmeijgvanh gyoengqde, doengzseiz lij dawz aen hagdangz neix dajcauh baenz miz suciz gyauyuz、minzcuz gyauyuz、daegsaek gyauzyuz, cingjdaej dawz aen hagdangz neix dwkcauh baenz aenhag vwnzva“Cuengh”, aen hagdangz neix haibanh liux Cuengh Gun song saw vah cangcoz、minzcuz yinhyoz、minzcuz vujdauj、minzcuz dijyuz、meijgungh caeuq sufaz daengj roek aen seqduenz miz vwnzva daegsaek Bouxcuengh.（Luz Vanjcinh/陆婉珍）