“Bouxguhhong aeu gyaek guh bonj” coenz vah neix daxmeh gou gingciengz gangj, cungj swhsiengj neix gaenq geiq maenh youq ndaw uk daxmeh gou.

Gyanghaet, daengngoenz lij caengz okdaeuj, daxmeh gou gaenq saeg gij buhvaq daengx ranz liux lo, cawj haeux cug le, haeux caengz gwn sat, daxmeh couh siengj roengz reih bae guh hong, yawj gij yienghceij daxmeh, couh dwg mhouj hawj seizgan begbeg gvaq.

Gyangngoenz, mbwn lamz- fwtfwt, daengngoenz lumj feiz ityiengh venj youq gwnzmbwn, daxmeh cungj dwg daenj aen mauhdiemx youq ndaw reih ciemz nywj, vat mieng, dwk bwnh……Gij hanh lumj duhhenj hung ityiengh, dida dida doek roengz gwnz dieg bae, daxmeh cij dwg uetuet hanh le youh laebdaeb guh hong, cungj mbouj yietnaiq saek yaep.

Vaiqhaemh rumz menh- menh ci daeuj, duzroeg mbin haeuj rongz bae lo. Daxmeh duet aen mauhdiemx roengzdaeuj, yungh fwngz roi gij byoem nyungqnyatnyat de, riunyum- nyum dwk byaij ma ranz. Ma daengz ranz hix mhouj naengh saek yaep. Cawj ndei haeuxcaeuz le, youh doq bae gueng mou.Gwncaeuz seiz, daxmeh cij miz seizgan cam gou cozyez sij caez caengz? Gaujsi ndaej geijlai faen? Danghnaeuz guh ndaej mbouj ndei, de couh siengj moeb gou, hoeng fwngz yaengx ndaej gig sang, moeb youq gwnz ndang gou cix dwg mbouj in saek di. Danghnaeuz gou bingh lo, daxmeh cungj hwnzngoenz ciuqgoq gou, cam gou siengj gwn gijmaz, lauheiq gou bingh ndaej naek lai.

Daxmeh gou mbouj lau sinhoj mbouj rox ngaengh dwk gaenx- gyaek guh hong, de dwg boux daxmeh ceiq bingzciengz youh ceiq hungmbwk ndeu.

（指导老师：覃福奇）