Sai:

Go’ndoek caeuq gofaiz,

Bai doxbaih henz dah.

Daengz neix deq nuengx ha,

Fwen siuhsaj it seiz.

Mbwk:

Cien naj gwn raemxdaemz,

Cien laeng gwn raemxmboq.

Daengz neix caj beix go,

Fwen roengz loh lawz bae.

Sai:

Ngoenzbonz raeuz gizgauj,

Mwngz gauj ndaej geijlai?

Gou cam mwngz haenj gvai,

Ndaej geijlai faensoq.

Mbwk:

Yijvwnz ndaej hajbet,

Suyoz ngamq cibhaj.

Mbouj baenz vunz beix ha,

Mbouj miz naj doiq vunz.

Sai:

Banneix aen seiqgyaiq,

Gaiqgaiq yungh vwnzva.

Gou naeuz mwngz nuengx ha,

Miz vwnzva cij baenz.

Mbwk:

Gangj doegsaw daeuj daengz,

Gou ngeixyaeng lailai.

Diuz mingh gou mbouj gvai,

Ngeixyaeng baenzneix lai.