Sai:

Cieng ngeihseiq ram you,

Gyaeuj mou baij gwnz daiz;

Duzyou byaij gvaq gai,

Bauj vunzlai vuenyungz.

Mbwk:

Cieng ngeihseiq ram you,

Gijraeuz bouxboux angq;

Oemq laeuj gang dem gang,

Deq bang baengzyoux daeuj.

Sai:

Ngoenzneix cieng ngeihseiq,

Seiqhenz cungj hemq riu;

Vunz ganj bae caeq miuh,

Caenx dwk giuz yaek raek.

Mbwk:

Ngoenzneix cieng ngeihseiq,

Seiqhenz miz sing go;

Mboujguenj geq rox coz,

Gunghoh raeuz Yinghhih.

Sai:

Haeuxnaengj rangyimyim,

Aensim angqyouyou;

Gyoengq caencik baengzyoux,

Angqcoux daeuj Yinghhih.

Mbwk:

Faenjsoemj ranzranz miz,

Gya di duh caeuq coeng;

Feihdauh caen mbouj doengz,

Gwn roengz dungx nanz lumz.

Sai:

Gwnz gai gyaeujvunz ndaem,

Gwnz doem bauqceij hoengz;

Vunz baenzbang baenzgyoengq,

Doengz bongh daeuj Yinghhih.

Mbwk:

Gwnz roen ci baenzrangh,

Geuj baenzbang foenxfoenx;

Doemhenj mbin baenzroen,

Moengfoenz boux byaij roen.

Sai:

Seiz Yinghhih vunzlai,

Gaiqgaiq cungj miz caez;

Gimngaenz coux rim daeh,

Bit gaeq ciengx baenz ranz.

Mbwk:

Ok gai miz ci naengh,

Daengz ranz miz gunghdiuz;

Duznyungz caiq mbouj ciuz,

Hemqriu gvaq saedceij.

Sai:

Lwg Yinghhih coengmingz,

Lumj duzlingz gwnz bya;

Mbouj luenh guh gijmaz,

Gimngaenz ma baenzraq.

Mbwk:

Lwg Yinghhih coengmingz,

Hwnj laeuz bingz gwnzmbwn;

Ngiengx gyaeuj yawj laeuz gwnz,

Mauh doek gwnz giujdin.

Hab:

Gyoengq caencik baengzyoux,

Gijraeuz aeu ndaejgeiq;

Bimoq cieng ngeihseiq,

Lij caez daeuj Yinghhih.