3 nyied 18 hauh, daihhingz Heiqbegvah baij baihnamz《Muzlen Gouq Meh》 youq Aen Heiqciengz Gizdieg Yisuz Minzcuz Namzningz Si yienj, neix dwg ndwenndwen yienj “yaem Heiqbegvah Namzningz” bi 2017 ciengz daihsam yienjok. Dang- guh dieg yienjok leih beksingq Namzningz Si, ndaej daengz boux- maez haenhndei.

Daihhingz Heiqbegvah baij baihnamz 《Muzlen Gouq Meh》 ndaej haenh baenz heiq daenj buhvaq ciuhgeq daengzdaej dauqgvi ndaw rungj Heiqbegvah gaeuqgeq haenx, dwg gij cozbinj daiqbiuj Heiqbegvah baij baihnamz, louz miz haujlai heiq baizciengz conzdungj caeuq goengfou baij baihnamz, gig miz funggek baij baihnamz mingzbeg. Yienj heiq seiz langhbaij gij goengfou foux genbuh caeuq dinfwngz “caijgyauh” nem “canjyiz” “diuqdaiz” daengj dinfwngz Heiqbegvah daegbied gagmiz haenx.

Ngoenzhaenx yienjok yinx ndaej haujlai bouxyawj bouxcoz, gyoengqde dingzlai dwg daihhagseng youq hag, biujyienj heiq conzdungj ndaej baenzneix angqcoux, youq Namzningz noix raen.

Gaenh bi neix daeuj, Namzningz doi ok ndwenndwen yienj “yaem Heiqbegvah Namzningz” dingh dieg yienjok caeuq dingh seiz yienjok, caemhcaiq saedhengz gij vunqsik comzyienj leih beksingq yienjok. Siminz yungh sinhfwncwng bae daengz Aen Heiqciengz Gizdieg Yisuz Minzcuz Namzningz Si couh ndaej lingx biuq yawj heiq mbouj aeu cienz, vihneix ndaej daengz bouxmaez haengjgyaez.

(Yangz Gingbingz/颜庆平)