3 nyied 16 hauh, ciet fwenliuz Yangjnganz Denzdungh bi 2017 youq Denzdungh Yen Swhlinz Cin Gvangjyangj Cunh Mbanjyangjnganz banh.

Hawfwen yienhciengz, foux lungz foux saeceij ndeiyawj gvaqlaeng, 20 doih canghfwen ndang daenj buhvaq minzcuz daj rog yienh ndaw yienh daeuj haenx hwnj daiz doxdax eu fwen, doiq fwen doxdax dungxcaiz, ceng dang “fwenvuengz”. Gyoengq canghfwen yungh gij fwen sikhaek guh haenx ciengq ok gij singsim vuenyungz vunzlai, ciengq ok le vunzlai gyaepgouz saedceij gyaeu- ndei, laemxmboujseiz yungh gij swz mizyinx ndeiriu haenx, hawj bouxyawj yienhciengz riu dwk dungx in bae, haujlai bouxyawj dawz soujgih okdaeuj ingj siengq louzniemh, gingjsaek “fwenhaij” Yangjnganz nauhyied raixcaix. Ginggvaq 3 aen cung doxdax, doeklaeng doih cangh- fwen bouxsai Vangz Yungzhingh、 Liengz Swnghoz caeuq doih canghfwen mehmbwk Lingz Siulenz、 Lingz Siujmei faenbied aeundaej fwenvuengz fwenliuz doxdax “ciet fwenliuz Yangjnganz Denzdungh bi 2017”.

Ngoenzhaenx, ciet fwenliuz hozdung lij miz aen yizsi gouz fuk mbaenj fuk、 langhbaij cozbinj ingj siengq Sihlinz cingzcik “buet siujgangh·yawj doengzyieng”、 baij gijgwn daegsaek daengj hozdung dem, moix dieg hozdung cungj gig nauhyied, yienhciengz vunz lai vunz daih, caezgya caez roxnyinh gij angqyangz gvaq ciet.

(Veiz Gingli)