Bonjbauq siusik (gicej Cau Dwzfeih) 3 nyied 16 hauh banhaet, Cunghgung Cungzcoj Siveij、 Si Cwngfuj youq Cungzcoj banh aen hoih fatbouh sinhvwnz ciet vwnzva Byaraiz Cungzcoj bi 2017. Cungzcoj Siveij cangzveij、 senhconzbu bucangj、 fusicangj Lij Cindangz, Si Minzcunghveij cujyin Cau Gan, Si Vwnzva Sinhvwnz Cuzbanj Gvangjdengiz gizcangj Luz Hansinh, Si Lijfazveij cujyin Fungz Boh, Cungzcoj gak yienh(si、 gih) cwngfuj lingjdauj faenguenj、 senhconzbu lingjdauj faenguenj daengj camgya aen hoih fatbouh sinhvwnz.

Gwnz aen hoih fatbouh sinhvwnz, Lij Cindangz yiengq 36 aen cunghyangh、 Yanghgangj youq Guengjsae、 Guengjsae gak gaep gak loih sinhvwnz meizdij gaisau gij laizlig ciet vwnzva Byaraiz Cungzcoj nem gij cingzgvang binaengz banh haenx caeuq gij neiyungz cujyau nem daegdiemj ciet vwnzva Byaraiz Cungzcoj bi 2017. De doengzseiz naeuz, ciet vwnzva Byaraiz bineix cujciz fuengsik gyonj hwnjdaeuj naeuz, couhdwg: Cwngfuj guhdaeuz、 bumwnz fucwz、 gwnzbiengz camgya、 ciuq hawciengz guh.

Gicej daj yienhciengz aen hoih fatbouh sinhvwnz rox, ciet vwnzva Byaraiz Cungzcoj bi 2017 yaek youq 3 nyied 30 hauh haimuq, baez ciet vwnzva Byaraiz neix miz vwnzyi、 lijyouz、 dijyuz、 minzsuz、 gaicawx、 doxgyau vwnzva、 minzcuz doxgiet cinbu gyauyuz daengj 7 aen hozdung hung, yaek banh “fwen daj Byaraiz daeuj”——aen hoih cimyawj nem hoih yienjciengq fwen gagcaux Byaraiz、 doxdax eu fwen、 aen hozdung geiqniemh gobo Louz Samcej doekseng、 vwnzyi Byaraiz vangjloz cauxsij doxdax、 langhbaij ingj siengq dozveh raiz saw mauzbit “hoenz Byaraiz”、 gijgwn ndei doxdax、 gag hai ci youz lajmbanj、 youzcet yawj vwnzva lajmbanj、 foux fouxsaux、 bau aendomq、 aen hozdung youq lajmbanj bin bya lienh ndang、 aen denjlij caeqbaiq cojcoeng Loegvet ciet vuengz Loegvet Byaraiz、 baij gai doxgaiq okmingz doxgaiq ndei、 “sam nyied sam Bouxcuengh·byaij loh sei vwnzva”——beixnuengx Cuengh Dai angqyangz yien fwngz、“song hamq hom myokgveiq·daengx ranz caen Cunghvaz”——Guengjsae Daizvanh raiz saw vehveh ingj siengq vwnzyi doxgyau hozdung、 bouxdaeuz vazgyauz Mbanjcuengh caez angq “sam nyied sam”、 langhbaij gij cingzcik minzcuz doxgiet cinbu saehnieb、 minzcuz doxgiet cinbu senhconz haeuj segih haeuj gvangjcangz haeuj gunghyenz hozdung、 duenz yawjngonz siujsoq minzcuz yawj hag hozdung daengj geijcib aen baenzdauq hozdung. Baenzdauq cezmuz ndeiyawj neix, yaek hawj gyoengq bouxhek daj bet fueng daeuj haenx daejniemh baez ngaizhoengh vwnzva minzcuz he, youq yiengjsouh ngaizhoengh vwnzva seiz angq mbouj dingz.

Gwnz aen hoih fatbouh sinhvwnz, Cungzcoj Si Vwnzva Sinhvwnz Cuzbanj Gvangjdengiz、Lijfazveij、 Minzcunghveij danhvei bouxdaeuz caeuq Ningzmingz Yen、 Bingzsiengz Siveij Senhconzbu nem Aen Gunghswh Mizhanh Gujfaenh Douzcienz Byaraiz Cojgyangh bouxfucwz hoizdap le gij vwndiz diemjrongh、 dieg yawj ceiq hung ciet vwnzva Byaraiz Cungzcoj bi 2017, Cungzcoj Si baenzlawz hen yungh ndei vehbangxdat Byaraiz mbaw vwnzva mingzben seiqgyaiq gaep neix, guh ndei bien faenzcieng hwngfat lijyouz vwnzva, roengzrengz hwnjguh baenz gizdieg lijyouz vwnzva daengx seiqgyaiq mizmingz, Ningzmingz Yen bineix banh ciet vuengz Loegvet bi 2017 miz gijmaz daegsaek caeuq diemjrongh daengj gicej daezok haenx.