Lwgda Yenz lauxsae hix nyinh lo, de gungj hwet dawz aen cuzgiuz henz din de hwnj, byaij daengz henz ndang Dangz Dahaij, aeu cuzgiuz menhmenh cuengq daengz ndaw fwngz Dangz Dahaij bae.

Loq dingh yaep ndeu, Yenz lauxsae laebdaeb cujciz gyoengq doengzhag daujlun cozvwnz: “Lajneix cingj daihgya bingzbingz yawj, vih gijmaz cozvwnz Liuz Yenz ndaej gangjfug daihgya, hoeng cozvwnz Dangz Dahaij cix mbouj ndaej gangjfug daihgya ne?”

Lij Cing boux daih’it ndwn hwnjdaeuj naeuz: “Cozvwnz Liuz Yenz ndaej gangjfug daihgya, cujyau dwg cozvwnz de miz gienh saeh gidij he, raeuz daj gienh saeh neix roxdaengz gij binjdwz ndei Lij lauxsae.”

Daegcoengh bouj naeuz:“Coz- vwnz Dangz Dahaij saetbaih couh dwg mbouj sawj vunz gamjdoengh, de cij daihgaiq gangj gij youhdenj Yenz lauxsae, mbouj cimdoiq moux diemj youhdenj sij gidij.”

“Ndaw cozvwnz mbouj yungh sij ok gak fuengmienh youhdenj boux vunz yaek sij haenx, wnggai gaemdawz gij binjdwz youqgaenj de, doenggvaq gienh saeh gidij he daeuj fanjyingj, gij cozvwnz yienghneix cij gamjdoengh vunz.” Yenz lauxsae yienghneix cungjgez.

“Gou rox wnggai baenzlawz sij lo.” Dangz Dahaij aeng dwk raemxda naeuz, “duenh vah gou haxbaenh gangj haenx, sij okdaeuj couh dwg bien cozvwnz gamjdoengh vunz he.”

(sat)