贵港市覃塘区蒙公乡凌寺小学三（2）班 覃星谐

Gou cuengqhag ma daengz ranz, haeuj ranz baez yawj, cij raen gwnz daiz miz mbaw ceij ndeu, gwnz ceij sij：“Siujsingh, daxmeh bae guh hong lo, mwngz swhgeij gag cawj byaek ba.” Gou ndawsim gag naemj：Dwg ha, daxmeh ciengzseiz youq rog guh hong, ma ranz lij cawj byaek hawj gou gwn, geijlai sinhoj ha. Gou gaenq sam nienzgaep lo, wnggai rox cawj byaek lo. Naemj daengz gizneix, gou gietdingh yaek hag rox cawj byaek.

Gou sien dawz mbawbyaek henjgeq mbaet bae, aeu doengj daengj le buenq doengj raemx, dawz byaek swiq ndaej seuq swtswt, yienzhaeuh aeu cax daeuj cab byaek, cab ndaej miz hung miz iq, dinj raez mbouj doengz. Caj rek hoengz ndat le, cuengq di youz roengz rek bae, caiq dawz byaek hix cuengq roengzbae, cij dingqnyi ndaw rek yiengj “bibi baba”, gou yungh canjbyaek fan bae canj dauq. Gvaq le seiq haj faen cung, gou cuengq di raemx roengz ndaw rek bae cawj. Mbouj gvaq geij nanz byaek couh cawj cug lo. Gou daek byaek roengz ndaw deb le, aeu dawh daeuj cimz, o, yienzlaiz mbouj geiq ndaej cuengq gyu lo.

Daengz haemh daxmeh guh hong dauqma, cam naeuz：“Siuj- singh, ngoenzneix byaek cawj ndaej baenzlawz yiengh ha?” Gou mbouj ndei eiqseiq dap naeuz：“Gij byaek dwg gou cawj, gou dawz byaek cawj cug lo, hoeng mbouj ndei gwn.” Daxneh mbouj gvaiq gou, angq dwk haenh gou majhung lo, rox saeh lo. Ndawsim gou lumj gwn le diengzrwi ityiengh van.

Gou dwg sam nienzgaep hagseng, gou hag rox cawj byaek lo.

（指导老师：杨金梅）