Di di — Aen ci doenghduz saek hoengzmaeq buet youq gwnz loh, gwnz ci naengh rim bouxhek. Bouxgaibiuq muimeuz umj hab biuq, daj gyaeuj ci byaij daengz laeng ci, hemq gangj:“Cingj cawx biuq, cingj cawx biuq.” Nyaengq ndaej hanh rim gyaeuj.

Noucoengz bibi rieng, bungj ok naed makcoengz daeuj cawx biuq:“Gou daengz Byamakcoengz.”

Douqhau bibi aen rwz raez- rangrang, yaengx duj raet ndeu daeuj cawx biuq:“Gou daengz Ndoeng- raet.”

Duz meuzraiz roi gij mumh, gamz duz byaroz daeuj cawx biuq:“Gou daengz Dahcinghhoz.”

Duzciengh gyae’gyang couh iet ndaeng gvaqdaeuj, yungh ndaeng soem gienj aen makgyoij:“Gou daengz Fa’makgyoij.”

Gyoengqde geij boux cawx biuq le, angqvauvau coh rog cueng yawj, geijlai ndei guhcaemz ha: Sou—, baenz go baenz go faex nem dwk aencueng ci coh baihlaeng buet, buet ndaej gyae’gyang le, vanzlij vadfwngz dem!

Hoeng ndaw ci miz vunz ngaem gyaeuj, raemxda dagdag doek roengz- daeuj, yaep he youh daejngungu hwnjdaeuj. Muimeuz byaij gvaqbae baez yawj, laxlawz dwg duzlingz, couh cam:“Duzlingz, mwngz baenzlawz la?”

Duzlingz daej naeuz:“Gou, hax- baenh gou boemz youq bakcueng, dawz makdauz, caj mwngz gvaqdaeuj couh cawx biuq, ci baez saenq, makdauz doek ok rog cueng bae lo, cawx mbouj hwnj biuq la.” Duzlingz gangj dwk gangj dwk youh daej lo. Dwg ha, naengh ci mbouj cawx biuq, geijlai vutnaj.

“Duzlingz mwngz gaej daej.” Dingq duzlingz gangj sat, noucoengz yaengx daeuj naed makcoengz ndeu. Douqhau yaengx daeuj duj raet ndeu, meuzraiz yaengx daeuj duz byaroz ndeu, duzciengh yaengx daeuj aen makgyoij ndeu.

Duzlingz yaepyaep lwgda hoengz- gywg, docih dwk muenghyawj daihgya, mbouj rox ciep doxgaiq bouxlawz ndei.

“Daihgya sou doxgaiq dauqbae ba, gij cienz bang duzlingz daeg- nuengx cawx biuq, gou hawj lo.” Muimeuz gangj sat sik roengz mbaw biuq ndeu hawj lingzlwg. De rox duzlingz yaek bae cangzyenjlienh majhidonz, duzlingz dwg boux yenj- yenz benz saux mizmingz.

Ngoenz daihngeih, muimeuz、noucoengz、douqhau、meuzraiz caeuq duzciengh, cungj sou ndaej Boux- soengqsaenq roeggaphau gamz daeuj fung saenq ndeu. Baez sik byuksaenq, mbon ok mbaw ceij hoengzmaeq ndeu. Gip hwnjdaeuj baez yawj, haha, dwg duzlingz soengq hawj mbaw biuq ndaej bae yawj biujyienj bajheiq he.