Guh gienh saeh neix liux, Lij Genh couh ok dou lo. Mboujliuh de ngamq byaij bae cibgeij yamq, youq bakdou aen bouq de couh miz haujlai vunz homh hwnjdaeuj, aenvih vunzlai raen miz ceij nem okdaeuj, laihnaeuz miz maz youhvei hozdung. Seizneix, miz lwgcaeg ndeu iet fwngz bae aeu aen byuksaenq. Lij Genh yawjraen, cij rox boihseiz lo, lwgcaeg haenx laihnaeuz aen byuksaenq miz maz doxhuq dijcienz couh bae aeu lo! Lij Genh hemq naeuz:“Hai, hai, ndawde dwg vwnzgen ndwi.” Byawz rox lwgcaeg haenx baez dingqnyi miz vunz hemq, yo ga couh buetdeuz. Lij Genh muengz bongh bae gyaep. Lij Genh dwg boux dangbing gvaq, ndang miz rengz, gvaq mbouj geij nanz, yaek gyaep ndaej lwgcaeg haenx lo, byawz rox lwgcaeg haenx hixnaengz vut aen byuksaenq roengz gyang dah bae.

Lij Genh rox byuksaenq youq- gaenj, hixnaengz bongh roengz gyang dah bae. Saekliemq miz byuksaenq duk, gij vwnzgen mbouj deng raemx haeuj. Lij Genh aeu byuksaenq dauq le, youh ganj bae yen cwngfuj lo. Byawz rox bae daengz gizhaenx, gij vunz ndaw cwngfuj naeuz, aenvih bineix bouxduivuj lai lai, aen mingzngeg doeklaeng youq buenq aen cungdaeuz gaxgonq deng dwnghgi liux lo! Lij Genh couh yienghneix lauq bae aen gihvei aeu aen bouqmienh moq ndeu lo.

Yawj Lij Genh vih gyaep caeg saet bae aen gihvei aeu bouqmienh, gobiuj de gig simnyap. Ngoenz daih- ngeih, gobiuj de youh daeuj aenbouq:“Guh vunzndei dijcienz? Simndei dangq haeux gwn?” Lij Genh doiq gij “hit” neix nyi gvenq mbouj gvenq lo, cij amq youq mbouj gangj. Gobiuj de gig fouznaih, naeuz:“Gienq mwngz mbouj dingq, mwngz couh cungj guh vunzndei ba, yawjyawj, haetneix bauqceij, hw, yienghneix naengz dangq haeux gwn?!” Gobiuj de gangj le dawz faenh bauqceij ndeu gveng youq gwnz daiz. Lij Genh swnh fwngz aeu daeuj yawj. Baez yawj doeksaet hwnjdaeuj, gwnz bauqceij couh dwngh’ok gienh saeh de gyaep caeg, eiqsei daihgaiq dwg boux lauxbanj bouqhaeux ndeu vih bauj faenh vwnzgen bouxhek bae gyaep caeg, deng lauq aen gihvei leh bouqmienh moq bae. Lij Genh yawj liux gig mbouj angq:“Ndaek vunz mwngz ha, gyaep lwgcaeg lij deng mwngz guh baenz sinhvwnz okdaeuj!” “Yo, bang mwngz gangj gij ien’uengj okdaeuj lij deng mwngz naeuz dem, dwg vunz bause cam gou, gou hix gangj gij vah caen ndwi, youh mbouj gangj gyaj!” Gobiuj rag fajnaj raezlanglang naeuz.

Hoeng, saeh Lij Genh gyaep caeg couh lumj raemx hemj gwnz rek, mwh goenj ndwetnyanya, gvaq mbouj geij nanz couh caemlwedlwed lo.

Buenq bi gvaqbae, diuz haw geq nauhyied lumj gaxgonq, gij mbouj doengz dwg, aen bouqhaeux Lij Genh seng’eiq ndei hwnjdaeuj lo, lienz Lij Genh swhgeij cungj hix siengj mbouj doeng vihmaz.

Miz ngoenz ndeu, cingq dwg Lij Genh muengz vih bouxhek cauj byaek seiz, miz boux vunz ndeu buet haeuj ndaw bouqhaeux daeuj:“Lauxbanj, cauj song aen byaek, yied vaiq yied ndei!” Lij Genh seizneix cingq muengz, couh naeuz:“Mwngz menh naengh caj, vahsug gangj ndaej deng, gwn haeux dauhleix hung, guen daengx cungj mbouj hwnj.” “Yo, lauxbanj banneix boenq dahraix lo, yienghneix mwngz vihmaz mbouj heuh gou bae aen bouq wnq ne, couh song sam yamq roen ndwi.” Lij Genh dingqnyi de gangj neix, cungj lumj baenz miz di saeh saek gyaeujsim, couh cienq naj bae yawj, de menh cim menh siengj, gvaq yaep ndeu couh roxnyinh lo: Boux hek neix couhdwg boux buenq bi gonq deng vwnzgen doek youq aen bouqhaeux. Lij Genh hixnaengz naeuz:“Lauxhek neix, mwngz dwg dauq ra vwnzgen ba, gou lij ce youq ndaw sieng ne.” Boux hek haenx riuhaha naeuz:“Mbouj yungh lo, ngoenzde gou hix mbouj rox vwnzgen deng doek gizlawz bae, ndigah gou hix mbouj bae ra, daeklaeng bae bouj banh ndei lo, dauqfanj dwg mwngz, vih gienh saeh neix aeu mbouj ndaej bouqmienh moq.”

Lij Genh muengz liux, boux hek haenx heuh de naengh roengz gangjgoj. Lij Genh cij rox, boux hek neix dwg boux youq cwngfuj guh hong, de naeuz daj de yawjraen bauqceij dwngh’ok gienh saeh Lij Genh gyaep caeg, de couh gig gamjdoengh. Doeklaeng de dwngh aen sinhvwnz haenx hwnj gwnz vangj cwngfuj doiq rog lijyouz bae, mbouj gvaq buenq ndwen, haujlai bouxyouz youq gwnz vangj de ce vah roengzdaeuj, haenh naeuz boux lauxbanj aen bouq neix simndei, aen bouq de haengjdingh gig noix guh gyaj, bae Cingsih youz itdingh bae aen bouq de cimzcimz……

Boux hek haenx caeuq Lij Genh gangj haujlai vah. Lij Genh dwg boux lauxsaed, hoeng de mbouj bwnh, aen bouq de seng’eiq ndei, couhdwg daj gienh saeh de gyaep caeg daeuj, yenzlaiz dwg yienghneix.

Ngoenz ndeu, gobiuj Lij Genh youh daengz aen bouqhaeux youz- langh, raen Lij Genj gig boenq, de couh ngeiz naeuz:“Geizgvaiq lo, geij ndwen neix daeuj aen bouq mwngz gig hoengh, mwngz youh mbouj ra vunz daeuj naengh diemq, vihmaz nei?” Lij Genh riu naeuz:“Aenvih gou guh boux vunz ndei ha.” Gobiuj de dingq le hix riuhaha, de laihnaeuz Lij Genh caeuq de gangjriu. Hoeng youq Lij Genh daeuj gangj, coenz vah neix caen daj ndaw sim de gangj okdaeuj.

（sat）