Seizcin daeuj lo, doenghgo didngaz, doenghduz ok rongz, va caeux seizcin cingq riu coh raeuz, vadauz hai ndaej hoengzfwdfwd, va’ndokgengj、 vadanqcaz、 va- vengj …… cungj ceng gonq lau laeng hai dwk.

Va hom yinx daeuj geij duz rwi dwggyaez, gyoengqde yaep he sup aeu vafaenj duj va neix, yaep he youh bae sup vafaenj duz va haenx, nyaengqfoedfoed. Sawqmwh youh miz geij duz mbungqmbaj mbin gvaqdaeuj, gyoengqde mupmup duj va neix, youh mupmup duj va haenx, lumj dwg naeuz:“Va iq, mwngz caen hom ha, caen gyaeundei ha!” Mbungqmbaj youh mbin daengz baihnaj duzrwi bae, lumjbaenz doiq duzrwi naeuz:“Dahnuengx rwi, mwngz ngoenzngoenz haet ok haemh dauq, nanzdauh mwngz mbouj baeg ha?” Duzrwi riuriu youh nyaengq bae aeu vafaenj lo.

Go’nywj daj daej namh ndonj okdaeuj, maj ok nywj iq heuoiq. Gwnz diegnywj hix maj ok haujlai vacwx, miz mbangj saeknding, miz mbangj saekhenj, miz mbangj saekgyaemq, miz mbangj saek- lamz…… vacwx gak saek gak yiengh, boiq hwnj go’nywj heusau- sau, yienh ndaej engq gyaeundei, engq dwggyaez lo. Raq rumz iq he ci daeuj, go’nywj caeuq vacwx angqvauvau bi bae bi dauq diuqfoux lo.

Goliux ietnonx mbat he, daj ndaw loq ndiu gvaqdaeuj, de sikhaek saj gij fapswd de, sawj swhgeij maj ok nyod iq heuoiq, de bienqndaej engqgya gyaeundei lo, rumzcin baez ci, “byoem” goliux riengz rumz bibuengq, gij yiengh de gyaeundei dangqmaz.

Seizcin, mwngz caen dwg aen geiqciet vava loegloeg gyaeundei he!

(seiq nienzgaep Vangz Cunhli)