Bi 2016 doxdaeuj, Hozciz Si Dunghlanz Yen Sanhnung Yauzcuz Yangh haujlai ranzgungzhoj sawq hwngfat daegsaek dajciengx, gyavaiq yamqdin laisou vut gungz, aeu ndaej yauqik haemq ndei.

Sanhnung Yangh dwg Dunghlanz Yen aen Yauzcuz yangh dandog he, daengx yangh miz ranzgungzhoj 505 ranz 1958 boux, ndawde bi 2016 guh dangjan laeb gaj ranzgungzhoj miz 170 ranz 673 boux. Vih gyavaiq yamqdin cingcinj vut gungz, bineix, youq cwngfuj gujli caeuq haeujcoengh lajde, aen yangh neix haujlai vunz hainduj sawq hwngfat daegsaek dajciengx, aeu ndaej yauqik haemq ndei.

Youq Sanhnung Yangh Banjlanz Cunh, cunhveij fucujyin Gungj Fanzyungj daiqdaeuz sawq hwngfat ciengx nouhaet. Seizneix, de gaenq ciengx miz 800 lai duz nouhaet. Gungj Fanzyungj naeuz: “Noufaen ciengx daengz 8 daengz 12 ndwen couh miz bang lwg moq lo, nouhaet aeu bae gai haenx ciengx 8 daengz 10 ndwen ndaej gai”. Ciuq gyaqcienz hawciengz, de bi ndaej leih daih’iek 5 fanh maenz ngaenz baedauq.

Ndaejdaengz Gungj Fanzyungj yingjyangj, vunzmbanj Veiz Dungh engq mbeihung, de youq henz ranz swhgeij hwnj dieg ciengx doenghduz, cienmonz ciengx ngwzhaeuq caeuq ngwzsuijli, seizneix de gaenq ciengx daengz 1500 duz baedauq. Veiz Dungh naeuz: “Seizneix faeg gyaeq caeuq ciengx cungj dwg de boux dog guh, bi gai ca mbouj lai 1000 lai duz, cawz bae cingzbonj, bineix gujsuenq souhaeuj 7 fanh maenz ngaenz baedauq.”

(Liengz Cizveij/梁值伟 Veiz Fungh/韦 峰)