Bonjbauq siusik (gicej Cau Dwzfeih Veiz Yingj- cinh) 2 nyied 22 hauh banhaet, Swcigih Minzcunghveij、 Minzyijveij youq Mamzningz hai aen hoih hong hidungj Minzcunghveij Minzyijveij daengx gih bi 2017. Swcigih Minzcunghveij、 Minzyijveij dangjcuj suhgi Luz Yenbenj camgya hai hoih caemhcaiq gangjvah.

Luz Yenbenj youq dauqyawj hong bi 2016 seiz naeuz, youq Guekgya Minzveij、 Guekgya Cunghgyaugiz caeuq Swcigih Dangjveij、 Cwngfuj cingqdeng lingjdauj lajde, daengx gih Minzcunghveij、 Minzyijveij hidungj haeujlaeg hagsib gvancez Siz Ginbingz cungjsuhgi baenzdauq gangjvah youqgaenj daegbied dwg gij cingsaenz baenzdauq gangjvah youqgaenj gvendaengz hong minzcuz cunghgyau, doicaenh cienzmienh daj yiemz guenj dangj、 lienzdaemh haeujlaeg gvancez doeksaed gij cingsaenz aen hoih hong minzcuz Cunghyangh caeuq daengx gih, mboujduenh gyagiengz “seiq aen yisiz”, mboujduenh gaijndei guhhong cozfungh, cietsaed gyagiengz bonjndang hwnjguh, roengzrengz guhhong, laemxsim guh baenaj, gung roengz hojnanz, aeu ndaej le cingzcik moq. Cujyau daejyienh youq geij fuengmienh lajneix: Nyinhcaen sonyinx swciyen、 minzcuz yangh couzbei bungz 10 hopbi angqhoh hozdung; doicaenh hong hwnjguh dieg guhyiengh minzcuz doxgiet cinbu aeundaej cingzyauq moq; gaenxmaenx coicaenh siujsoq minzcuz dieg comzyouq ginghci gwnzbiengz gyavaiq hwngfat; swnjcienz caeuq hwngfat vwnzva conzdungj maenhndei siujsoq minzcuz; nyinhcaen guh ndei hong cunghgyau; minzcuz yenzgiu、 sawgaeuq minzcuz、hagdangz daengj hong aeu ndaej cingzcik moq; netsaed doicaenh hong saw vah minzcuz laebfap diuyenz; netsaed doicaenh hong gwnzbiengz yungh saw vah minzcuz; netsaed doicaenh hong fugsaeh fanhoiz saw vah minzcuz; netsaed doicaenh hong okbanj sinhvwnz caeuq senhconz saw vah minzcuz daengj.

Luz Yenbenj youq anbaiz hong bi 2017 seiz naeuz, daengx gih Minzcunghveij、 Minzyijveij hidungj aeu gwnz laj caemhsim, youq bi’gvaq gvancez doeksaed gij cingsaenz aen hoih minzcuz Cunghyangh caeuq daengx gih aeu ndaej haidaeuz ndei giekdaej gwnzde, bineix laebdaeb doicaenh, laebdaeb gaemgaenj、 gaem ndei hong gvancez doeksaed. Gij yinvu hong cujyau de couhdwg aeu gyagiengz minzcuz doxgiet、 henhoh gwnzbiengz onjdingh; guh ndei hong minzcuz ginghci; coicaenh minzcuz vwnzva gyauyuz dijyuz hwngfat; netsaed haiguh hong cunghgyau, coicaenh cunghgyau huzndei；gyagiengz hong senhconz saw vah minzcuz; gyagiengz hong saw vah minzcuz laebfap; gyagiengz hong gwnzbiengz yungh saw vah minzcuz; gyagiengz fugsaeh fanhoiz saw vah minzcuz daengj.

Aen hoih lij doeg le《Gij Gietdingh Guekgya Minzveij Gvendaengz Gaujhaed Dajciengj 2016 Nienzdoh Daengx Guek Minzveij Hidungj Hong Saenqsik Cizdij Maenhndei Caeuq Bouxvunz Maenhndei》, doengbauq biujcangh le 2016 nienzdoh daengx gih minzcuz cunghgyau hidungj hong saenqsik cizdij senhcin caeuq bouxvunz senhcin. Gwnz hoih, miz 8 aen danhvei bouxfucwz cujyau guh le gij gingniemh guhhong doxgyau gangjvah.

Gak si minz(cungh）veij(giz)、 minzyijveij cujyin (gizcangj)、 dangjcuj suhgi, gijgenjcuj cujcangj; gak si minz(cungh）veij(giz)、 minzyijveij bangunghsiz cujyin; gak yienh(si、gih) minzcuz(cungh)giz gizcangj, minzyijgiz(ban) gizcangj（cujyin） roxnaeuz lingjdauj faenguenj minzcuz (cungh)giz; Swcigih Minzcunghveij, Minzyijveij gihgvanh daengxcungq ganbu、 cizsuz danhvei bouxfucwz cujyau caeuq gijveij suhgi roxnaeuz bouxfucwz gijgenj genhcaz daih’iek 350 boux camgya hai hoih.