（ciep geiz gonq） 3 boux doxgap yawjraen hawciengz gaicawx mbouj ndei, foenfoen yungh gak cungj leixyouz iugouz doi cienz. Bouxfathwnj Veiz Swgauh cijndei diegdieg ciq cienz boiz gij ngaenz boux doxgap roengzbonj haenx. Haemhndaep, boh- meh Veiz Swgauh mboujduenh dwk dienhvah hawj lwg dauq ranz gvaq cieng, hoeng de ndang mbouj miz saek faen ngaenz cijnaengz naeuz nyaengq guh seng’eiq couh gvaqbae lo, boux dog ndoj youq ndaw rug mad raemxda.

“Huq ndei mbouj lau mbouj miz vunz aeu!” Gvaq cieng doeklaeng, Veiz Swgauh caiq haenq mbat damjceij moq, dawz cauq gauhbinz doiyiengq hawciengz yienh yangh miz muengh ndei gai haenx. Aiq dwg caijsoq ndei daeuj daengz, cij yungh dinjdet 20 lai ngoenz, Veiz Swgauh dawz cauq gauhbinz ndaw cang gaemmiz haenx gai bae liux! Ndaej yiengjsouh mbat angqyangz goengfou mbouj nguh boux mizsim he.

Laebbaenz Gunghswh Guh Seng’eiq Huq Cuzdienh Ndeiyungh

Cauq gauhbinz ndaej siminz doxcanj yungh, hawj Veiz Swgauh yawjraen hawciengz baenaj engq gvangq haenx. Vih roengzsim cauh- nieb, de yungh gyaqcienz sang gvaq hawciengz boix he co roengz aen bouqdiemq hawciengz gyahden moq youq Loh Liujyungh Liujcouh Si haenx. Mbouj geij nanz, de baenz boux cungjdaihleix Guengjsae cauq gauhbinz denhhoz; bi 2013, de laebbaenz Aen Gunghswh Mizhanh Cizdonz Dengi Mingzmingz Liujcouh Si, faennga gihgou youq Hozciz Yizcouh、 Lozcwngz、 Sanhgyangh、 Yungzsuij、 Yungzanh、 Laizbinh、 Vujsenh、 Siengcouh、 Ginhsiu、 Namzningz、 Baksaek daengj dieg cungj miz, cienmonz guh seng’eiq dengi dajcawj.

“Haenqguh mbouj wnggai dingz, cijmiz mboujduenh roengzrengz cij ndaej benz hwnj diegsang moq.” Veiz Swgauh naeuz, cauq gauhbinz mbouj dwg diemj satbyai cauhnieb, laeb- baenz gunghswh cij dwg ngamq hainduj cauhnieb. Seizneix, de mboujduenh yiengq dieg moq gya- gvangq, mboujdan gai gij cauq gauhbinz binjciz sang haenx, lij daihleix rekdenfangoh “gauhswhdaz- dwz” miz “feihdauh daxmeh” haenx, rekdenfangoh “gauhswhdazdwz” dwg youz dengi conhgyah Luz Yizmingz yenzgiu haifat okdaeuj. Yungh haeuxsan bujdungh, ndaej cawj ok gij haeux unqniu, youh homfwt haenx.

Veiz Swgauh bang Luz Yizmingz bauq guekgya cienleih, caemhcaiq doxyaeng aeu ndaej gij gienzdaihleix cienzbouh rekdenfangoh “gauhswh- dazdwz”. Aen gunghswh Veiz Swgauh cienmonz gai gij cuzdienh binjciz ceiq sang youh ndeiyungh haenx, muzdiz dwg hawj beksingq yungh ndaej cuengqsim、 yungh ndaej simsangj, gij caetliengh saedceij donqgwn baenz yamq baenz yamq daezsang lo, Veiz Swgauh cingq roengzrengz hawj siengjmuengh cauhnieb de engq fung- fouq.（sat）