“Majbingz Siengcouh dwg Mbanjcuengh, sai mbwk geq nyez ciengq Fwencuengh, Sihbyauh daj iq gyaez eu fwen, gaenx hag gaenx lienh baenz fwenvuengz.” Youq Siengcouh Yen Majbingz Cin Veizlungz Cunhveij Davungh Cunh, miz boux sai gyaez ciengq Fwencuengh he heuh Cinz Sihbyauh, de camgya “Guengjsae gyaeundei·lajmbanj cinghseuq” Guengjsae fwenvuengz doxdax Guengjsae Vwnzva Dingh caeuq Guengjsae Fwen Yozvei youq Siengcouh Yen banh haenx, caeuq ca mbouj lai bak boux fwenvuengz daj gak yienh si Guengjsae daeuj haenx caemh daiz doxdax, yungh gij sing fwen ndei dingq caeuq gij gi’gyauj eu fwen gvenqsug de ndaej hingz, ndaejdaengz bingzveij haenhndei, doeklaeng ndaej faensoq ceiq sang aeundaej mingz daih’it fwenvuengz Guengjsae. Cinz Sihbyauh yungh Vahcuengh yienj eu fwen, hawj yienhciengz bouxyawj haenh mbouj dingz.

Cinz Sihbyauh bi 1968 doekseng, daj iq couh youq Majbingz dieg Mbanjcuengh neix gvaq ndwenngoenz, caencik baengzyoux henzgyawj cungj gyaez eu Fwencuengh, daj iq couh ndaejdaengz Fwencuengh oenqyuem, daj de roxsoq hainduj, couh caeuq vunz ndaw mbanj hag eu Fwencuengh. Miz baez he, de caeuq vunz ndaw mbanj bae langh vaiz seiz, sawq ciengq gij fwen gip ndaej haenx, aenvih sing’yaem de ndei, geiq ndaej youh maenh, de laeglemx hag gij fwen bouxwnq ciengq haenx, lij gyahaeuj gij fwen gag bien, gig vaiq couh yinx ndaej vunzmbanj louzsim. Baez daengz ngoenz singhgiz, Cinz Sihbyauh daj hagdangz dauq daengz ranz, vunzmbanj bae hawfwen seiz, cungj gyaez daiq de bae, bae riengz hag eu Fwencuengh. Miz baez he bae hawfwen Liujgyangh Yen Conhsanh Cin youq gapgyaiq Siengcouh caeuq Liujcouh Si haenx, miz boux bohlungz Liujgyangh Yen he yungh Fwencuengh daeuq de “Roeglaej iqet diegdieg mbin, mbouj rox eu fwen luenh daeuj guh, mboujyawx vaiq di dauq ranz bae, mienxndaej bohmeh ra sinhoj.” Hoeng Cinz Sihbyauh bi’ndwen iqetet haenx mbouj fugheiq dauq yungh Fwencuengh hoiz de “Roeglaej iqet yiengjsoso, lwgnyez cib bi rox eu fwen. Mbouj yungh bohmeh daeuj son gou, dou gag coengmingz mbouj banhfap.” Daengx ciengz bouxyawj cungj haenh de lwgnyez cib bi neix eu fwen caen ndei youh raeuzrwdrwd.

Aenvih de dwg lauxdaih ndaw ranz, lij miz daegnuengx dahnuengx, de doegsaw daengz cuhcungh seiz, couh ngaiz buenqbangh dingz hag mbouj doegsaw dauq ranz bang bohmeh ndaem reih ndaem naz lo. Yienznaeuz dauq ranz guh hongreih hongnaz, hoeng de lij gyaez eu Fwencuengh. Majbingz Cin dieg youq gapgyaiq Liujcouh Si Liujgyangh Yen, liz Liujcouh Si hix mbouj gyae, youq 20 sigij 80 nienzdaih, de couh ciengzseiz gwih danci bae hawfwen Liujcouh Si、 Liujgyangh Yen. Miz baez he, Liujcouh Si banh hoihfwen sam nyied sam, dinbya Byayizfungh Liujcouh naengh rim bouxyawj, miz song boux canghfwen mehmbwk daengzciengz couh yungh Fwencuengh caeuq Cinz Sihbyauh doiq hwnjdaeuj “Gou dwg fwenvuengz Liujgyangh Yen, gyaez eu Fwencuengh bae seiqfueng, dinbya Yizfungh daeuj doxdax, dahnuengx hix daeuj ceng mingzdaeuz.” Canghfwen mehmbwk Liujgyangh ciengq sat, Cinz Sihbyauh couh yungh Fwencuengh doiq: “Gangj youx gangj gvaq cien bak baez, baeznaengz gangj le cungj saetbaih, aenvih ndaw ranz gungzhoj lai, gyahoj nanz baenz sueng baenz doiq.” “Duzrwi baenz gyoengq bae aeu va, cingj mwngz gaej dandog mbin bae, nuengx mwngz mbouj ndaej sim lailai, daeggo doiq mwngz dwg caencingz.” Doenggvaq bae hoihfwen dinbya Byayizfungh haenx, Cinz Sihbyauh aeundaej meh baz dauq lo.

Cinz Sihbyauh bineix ca mbouj lai 50 bi, hoizwngq gij iuheuh dangjveij cwngfuj, de gaenxmaenx bae guh hong “Guengjsae gyaeundei·lajmbanj cinghseuq”, de mboujdan youq ndaw mbanj daiqdaeuz guh hong lajmbanj cinghseuq, lij ciengzseiz yungh Fwencuengh senhconz gij ndeicawq lajmbanj cinghseuq. Gaenh song bi neix, haiguh Guengjsae gyaeundei lajmbanj cinghseuq fwen doxdax seiz, de cungj aeundaej itdaengjciengj, dingq gij Fwencuengh de ciengq “Lajmbanj cinghseuq aeu geiqmaenh, caezgya gaej luenh vut nyapnyaj; saedyienh siengjmuengh moq Guengjsae, bya heu raemx saw riunyumnyum.” Aenvih Cinz Sihbyauh ciengzseiz yungh Fwencuengh sevei cujyi hwzsinh gyacizgvanh, gag daiq- daeuz souj gijliz souj faplwd, bi 2015, ndaej bingz baenz boux hawj vunz aeueiq moq Majbingz Cin.