Haemq nanz haemq nanz gaxgonq, daeng- ngoenz caeuq ronghndwen dwg doiq ien’gya he. Miz ngoenz he, song boux de youh doxceng lo: “Ronghndwen, mwngz mbouj beij gou youqgaenj, mwngz roengzbae ba!” “Gou beij mwngz youq- gaenj!” Ronghndwen fanjbuek naeuz. Ndaundeiq yawj mbouj roengzbae lo, buet gvaqbae naeuz:“Sou gaej ceng lo! Hixnaengz sou bae cam gij vunz gij doenghduz doenghgo gwnz digiuz ba, yawj sou byawz engq youqgaenj.” Ndaundeiq ngamq gangj sat, daengngoenz caeuq ronghndwen buet bae gwnz digiuz lo.

Daengngoenz ra daengz boux vunz he cam:“Mwngz naeuz gou youqgaenj roxnaeuz ndaek ronghndwen youqgaenj?” Boux vunz haenx naeuz: “Mwngz youqgaenj, mbouj miz mwngz couh mbouj miz digiuz.” Dingq gij vah neix, daengngoenz riu lo. Gvaq yaep he, boux vunz haenx youh naeuz: “Hoeng mbouj miz ronghndwen hix mbouj miz digiuz.” Aen najriu daengngoenz gyaengj youq lo. Daengngoenz gig mbouj fugheiq, gietdingh bae cam ndaundeiq.

“Ndaundeiq, gij vunz gwnz digiuz hawj mbouj ndaej dapanq hawj dou.” Daengngoenz caeuq ronghndwen hujdengdeng dwk naeuz. “Yienghneix sou couh boux he lienz guhhong caet ngoenz, yawj byawz engq youqgaenj.” Ndaundeiq saenzmaed dwk riu naeuz.

“Ndei ba.” Gangj sat, gyoengqde couh caigienz gietdingh sawhingz daeuj dingh boux lawz guh gonq. Doeklaeng doengngoenz hingz lo.

Daengngoenz hainduj guhhong, de yungh caenh gij rengz de fat ok rongh caeuq ndat, de gag siengj: Hawj sou yawjyawj gij bonjsaeh gou. Ngamq hainduj, gyoengqvunz lumj bingzseiz nei mbouj roxnyinh miz maz mbouj doengz, hoeng daengz ngoenz daihsam, gyoengqvunz couh raen mbouj ndei lo. Gyoengqvunz gaenq haemq nanz mbouj ndaej ninz lo, daengx ngoenz mbouj miz cingsaenz, gvaengz da cungj ndaem lo. Ndaw dah raemx mboek lo, bya ndaw dah deng cik ndaej cug lo, roeggyaeujmeuz simgip dwk caj gyanghwnz doenghduz okdaeuj, gaeb ndaej saek duz daeuj gwn. Hoeng ndit daengngoenz rongh ndat, gyanghwnz cungj mbouj daeujdaengz, de simgip dwk hemq: “Yaek iek dai gou lo, gyanghwnz baenzlawz lij caengz daeujdaengz ha.”

Ndaundeiq yawjraen le, doiq daengngoenz naeuz: “Daengngoenz ha, caet ngoenz hix ca mbouj geij lai lo, couh hawj ronghndwen guh ba.” “Ndei ba.” Daengngoenz sikhaek roengzbya lo.

Mwh ronghndwen guhhong daengz ngoenz daihseiq, digiuz youh yaek dingj mbouj ndaej lo. Vwnhdu gwnz digiuz doek roengz gig daemq, doengh gij va gij faex cungj reuq lo, vunz caeuq doenghduz hix mbouj miz cingsaenz, naiqnuknuk, lwgda gawhgwdgwd.

Ndaundeiq raen le, gipmuengz naeuz: “Ronghndwen, mwngz gaej guhhong lo, digiuz yaek deng mwngz guh vaih lo.” Ronghndwen dingq ndaundeiq baenzneix gangj le, ganjgip dingz roengzdaeuj.

Ndaundeiq doiq gyoengqde naeuz: “Song boux sou ha, gak boux gag miz gij ndei swhgeij, hix gag miz gij mbouj ndei swhgeij, cijmiz sou doxhuz doxdei, cijndaej sawj lajbiengz engq gyaeundei.” Daengngoenz caeuq ronghndwen dingq le gig najmong, naj cungj nding lo. Song boux de vih swhgeij moegloet caeuq mbouj roxsoq gamjdaengz najmong, ceng dwk yiengq diqfueng gangj doiq mbouj hwnj, doeklaeng doxyawj riu lo, fwngz gaem fwngz byaij bae lo.

Daj seizde hwnj, daengngoenz caeuq rongh- ndwen baenz song beixnuengx gig doxndei, doxgap guhhong, ciuq rongh digiuz.

(roek nienzgaep Lij Mingzveij)