Vahsug naeuz: Ciuhvunz mbouj ndaej lumj byaek, dawz daengx caizliuh cungj caepcawq ndei le cij roengz rek. Aen Gunghswh Mizhanh Cizdonz Dengi Mingzmingz Liujcouh Si cungjginghlij Veiz Swgauh couhdwg buenq moengx buenq rox byaij hwnj diuz roen cauhnieb, itloh byaij gvaqdaeuj gig haemzhoj, hoeng de coengzlaiz mbouj vutvak. Veiz Swgauh naeuz: “Ciuhvunz neix ginggvaq le gumzgamx lailai, hix ndaejdaengz bouxwnq bangcoh lailai. Cijnaengz yungh gij gangj guh gyo’mbaiq bauqdap gwnzbiengz, aeu gij doxgaiq dajcawj yungh ceiq ndei haenx hawj beksingq.”

Haemzhoj Cauhnieb Daj Baij Deihdan Hainduj

Veiz Swgauh dwg lwg Boux- cuengh Yungzsuij Myauzcuz Swciyen Dalang Cin. Bi 2003, de daj budui fuzyenz dauq ranz couh dang hwnj le bouxyezvuyenz, cienmonz buet hawciengz siugai. Bi 2007, de bungz Cwngz lauxbanj boux vunz Anhveih.

Seizhaenx Cwngz lauxbanj dwg canghhawjhuq baijdan. Cwngz laux- banj nyoengx Veiz Swgauh, de couh swzbae faenh hong bouxyezvuyenz, byaij hwnj diuz roen cauhnieb. Baez daih’it baij deihdan, de mbat banringzgvaq he couh canh ndaej ca mbouj lai song bak maenz ngaenz. Bi 2008, Cwngz lauxbanj cienj hangz guh seng’eiq rekdenfangoh. Veiz Swgauh deng de yukyon gyau le haujlai cienz haeujhangz, doeklaeng baij de daengz daengx guek gak dieg bae buet yezvu. Bae Sih’anh、Gveiyangz、 Gunhmingz、 Anhsun daengj hawsingz hung rauq iq, de sou ndaej ca mbouj lai bak dan seng’eiq. Hoeng Cwngz cix gyaij dinghdan huqsoq noix lai, itcig mbouj fat huq. Doeklaeng seng- eiq cijnaengz saetbaih, Veiz vihneix siedbonj 2 fanh lai maenz. Habngamj yezvu doisiu seiz roxyiuj le Luz Yizmingz bouxmuguh rekdenfangoh, daj neix giet roengz le cingzngeih, louz roengz le gij vahndei doeklaeng saeh rwix bienq saeh ndei.

Yienznaeuz mbouj canh ndaej cienz fandauq youh siedbonj, hoeng baez neix hawj Veiz Swgauh roxyiuj engq lai. Youq Gveicouh buet yezvu seiz, de yawjraen aen cauq gauhbinz denhhoz beij denswzluz singqnaengz、 mbaetnwngz、 goengnaengz engq ndei aen cangj Fuzsanh guh haenx. Cauq gauhbinz dwg gij huq vuenhdaih swnggaep denswzluz. Doengsug naeuz, feiz haenq cauj byaek aeu yungh rek ndat daengz 360℃ doxhwnj gij byaek cauj okdaeuj cij ndei gwn, hoeng denswzluz doh ceiq sang cij ndaej daengz 280℃, hoeng cauq gauhbinz ndaej ndat daengz 500℃ doxhwnj, caemhcaiq cauq gauhbinz miz “swzlw leihyungh” gisuz ca mbouj geijlai mbouj miz swzfuzse, doiq ndangvunz mbouj miz sienghaih.

Hoeng aenvih hawciengz caengz baenz, seizhaenx cauq gauhbinz youq hawciengz Liujcouh gai mbouj baenz. Gawqyienz Liujcouh mbouj miz vunz gai gij huq binjciz sang baenzneix, vihmaz gou mbouj sawqsawq dwk hai diuz roen neix? Veiz Swgauh daj neix dawz gij moegbiu cauhnieb cienj- yiengq huqdienh dajcawj hangznieb.

Miz Gvaq Ndaw Ndang Mbouj Miz Saek Faen Ngaenz Mbouj Miz Banhfap Dauq Ranz Gvaq Cieng

Ngamq hainduj seiz mbouj lumj siengj seiz swnhleih, ndawde ceiq fanjdoiq Veiz Swgauh couhdwg meh baz de. Meh baz de nyinhnaeuz baijbaij deihdan canh di cienz gvaq ndwenngoenz couh ndaej lo, mbouj miz bietdingh aeu bae sinhoj cauhnieb. Baz de fanjdoiq hawj Veiz Swgauh loemqhaeuj ngaekngeu caeuq goenjgeuj gvaq. Doeklaeng, dwg gij siengjmuengh cauhnieb hoenxhingz baenqbangh, Veiz Swgauh sim miz ceiqheiq haenx gangjfug meh baz.

Gizsaed, ngaenzcienz cij dwg gij gazlaengz ceiq hung youq gwnz diuz roen cauhnieb. Cauq