Youq Gveilinz Si Bingzloz Yen Gyauzdingz Yangh Davanh Cunh miz bouxlaux he, de yungh cib lai bi seizgan, mbouj faen hwnz ngoenz sij le geij bouh sawcuenh caeuq sawheiq densigi geijcib fanh cih saw, hoeng itcig mbouj rox baenzlawz cij ndaej fatbiuj okdaeuj. Seizneix lij itcig sij faenzcieng mbouj dingz, ciengzseiz daengx hwnz mbouj ninz, raen bouxlaux baenz neix laemxsim sij faenzcieng, vunz ndaw ranz gig sim in caeuq fouz naihhoz, muengh miz vunz bang bouxlaux saedyienh aen siengjmuengh de.

Yienghneix bouxsij yungh di seizgan he, caenndang bae aen mbanj neix ra bouxlaux, haeujsim dingq gij siengjmuengh de, roxyiuj gij saedceij doekgonq de, dingq gij sim siengj de.

Baez haeuj daengz ranz de, couh yawj gij saw baij youq ndaw rug Yauz bouxlaux haenx, gij saw miz geijcib bi lizsij haenx, haujlai gaenq bienq henj lo, hoeng lij baujlouz ndaej caezcingj. Naengh roengz menhmenh gangjgoj, roxyiuj bouxlaux heuh Yauz Cauzcingh, vunz Gyauzdingz Davanh Cunh, bineix 66 bi, gonq 60 nienzdaih siujyoz bizyez, doeklaeng aenvih vwnzgwz nguh le hagsib, 80 nienzdaih youh bauqmingz gag hag Sawgun Vahgun, caiq doenggvaq dingh yawj gij saw gvendaengz, ciemhciemh roxyiuj caeuq hag rox le gij giekdaej sij faenzcieng. Aenvih baenzgya guhhong gij atlig hung itcig mbouj ndaej gaem bit hwnjdaeuj sij faenzcieng, bi 2005 aenvih baez loeklak he aen hwet deng sieng le, youq ranz yw sieng le cungjsuenq miz seizgan ndaej sij faenzcieng, youq bi 2007 de hainduj bae sij faenzcieng, doenggvaq ca mbouj lai 10 bi daeuj mbouj faen hwnz ngoenz sij faenzcieng, seizneix gaenq miz gij cingzcik iq he, sawcuenh geij bouh, lij miz sawheiq densigi bonj he, gya hwnjdaeuj miz geijcib fanh cih saw.

Gij sawheiq mizgven densigi haenx, bouxlaux yiengq bouxsij gaisau, coh sawheiq heuh 《Cingzyoux Fwn Rumz》, bonj sawheiq neix dwg gij ginglig caenndang bouxlaux gaijbien baenz, gig caen, dwg gangj gij saeh bouxlaux ciuh neix caeuq 8 boux lwgsau guhyoux, doengzseiz lij sij mbangj gojgaeq ciengzgingj saedceij guhhong aen nienzdaih haenx daengj……

Hawj bouxsij roxnyinh daengz angq dwg vunz ndaw ranz hix gig roxyiuj bouxlaux, mboujdan bang de cawx daengdaiz, lij cawx le haujlai ceij bit hawj bouxlaux sij faenzcieng. Bouxlaux caeuq bouxsij gangj, gij siengjmuengh ceiq hung de couhdwg hawj vunz caeuq danhvei mizgven yingjsi cauxsij ndaej yawjraen gij dungxcaiz de, ndaej haeujcoengh de, caeuq de doxgap aeu gij sawheiq de ingj baenz densigi.

Baenzneix yawj, bouxlaux doiq sij faenzcieng baenzneix laemxsim caeuq gyaepgouz baenzneix naekna, maqmuengh miz vunz ndaej vat gij dungxcaiz de okdaeuj, yungh bonj sawheiq de, hawj de vih ndawbiengz Bingzloz lingjyiz sij faenzcieng demgya di saekrongh lwenqda he.

Ciuq cam rox, bonj sawheiq《Cingzyoux Fwn Rumz》bouxlaux sij haenx ndaej ingj baenz lenzsuzgi 27 ciz baedauq, gungh miz ngeihcib lai fanh cih saw, seizneix lij miz 6 ciz baedauq neiyungz caengz sij sat.