“Ae!” Dangz Dahaij yungh genfwngz bungqbungq Liuz Yenz doengz daiz de, “Ngoenzneix dienheiq geijlai ndei, ceiq hab dik giuz lo. Danghnaeuz dangz cozvwnz sawj vunz gyaeujin neix vuenh baenz dangz dijyuz geijlai ndei ha! Daengzseiz gou haengjdingh angq lumj duzroeg gwnz faex nei.” Liuz Yenz yawj de mbat he, naeuz：“Mwngz cij rox dik giu, mbouj cwtsik.”

Dangz Dahaij da baez daengx, diuq hwnjdaeuj, naj nding dwk naeuz:“Dik giuz miz maz mbouj ndei, daengzcog gou itdingh haeuj Cungguek cuzgiuzdui bae, hawj cuzgiuz Cungguek byaij ok Yacouh, byaij coh seiqgyaiq.”

Cwnz Cungh dingq le, bak baez mbwnj, naeuz: “Loqraen.”

Dangz Dahaij ngamq siengj caeuq de bueklwnh, deng Lij Cing lanz youq naeuz:“Gaej ceng lo, vaiq hwnj goq cozvwnz ba.”

Mbouj gangj cuzgiuz le, Dangz Dahaij doeknaiq lo, aen’gyaeuj duix roengz, yungh fwngz roqroq aen’gyaeuj naeuz:“Cozvwnz, giz- neix dwg gyong ha.” Daegcoengh aeu fwngz fuz aen nganxciuq, lumj bouxgeq nei song fwngz cuengq baihlaeng, byaij bae byaij dauq, bibuengq aen’gyaeuj, menhmenh naeuz:“Aen’uk Dangz Dahaij mbouj dwg gyong, dwk saek haeuj aen cuzgiuz hung he, gij doxgaiq wnq couh mbouj miz dieg ndwn lo, hix nanzgvaiq de sij mbouj ok cozvwnz ndei daeuj.” Geij coenz vah daeuq ndaej daihgya cungj riu lo.

“Mwngz naeuz, ngoenzngeix goq cozvwnz, Yenz lauxsae hawj raeuz sij gijmaz ne?”

Cwnz Cungh cam hagsib veijyenz Cangh Hungzci. Cangh Hungzci cehda baez baenq: “Haengjdingh dwg bingzlwnh denyingj. Raeuz ngoenzlwenz mbouj dwg ngamq yawj denyingj《Ciuh Yiluz》ha?” Mbatneix, ndaw gyausiz lumj ndaw rek caq youz nei, gyoengq doengzhag mwngz coenz gou coenz ngeixlwnh den- yingj ngoenzlwenz yawj haenx.

(1)