Malwg riengz daxmeh ngamq daeujdaengz ranz bouxcawj. Gizneix miz haujlai baengzyoux iq, malwg angq dangqmaz. Daxmeh daengq de naeuz, itdingh caeuq gyoengq baengzyoux iq doxhuz doxndei.

Malwg yawjraen gyoengq gaeqlwg caez guhcaemz guh’angq, couh angq- vauvau buet gvaqbae, siengj caeuq gyoengqde guhcaemz, hoeng, gaeqmeh baez yawjraen de daeuj, couh swenj- goekgoek, gyoengq gaeqlwg couh sik- haek buet deuz lo!

Malwg saetmuengh dangqmaz, naj saepsaengsaeng daeuj caeuq daxmeh gangj: “Duzgaeq mbouj caeuq gou guhcaemz ne? Gou mbouj caiq caeuq gyoengqde doxndei lo!” Daxmeh nai de naeuz: “Lwg gvai gou ha, bouxlawz mbouj miz baengzyoux cix ndei ne? Itdingh caeuq gyoengq baengzyoux iq doxhuz doxndei cij- ndaej ha. Mwngz maj ndaej baenzneix hung, gyoengqde maj ndaej baenzneix iq. Mwngz mbouj sing mbouj swt couh buet gvaqbae, gyoengqde haengjdingh laihnaeuz mwngz buet bae haepha gyoengqde, couh lau ndaej buet deuz lo. Baezlaeng miz gihvei, mwngz bang ndaej gyoengqde, gyoengqde couh gag saenq mwngz lo.”

Ngoenzneix, malwg yawjraen gyoengq gaeqlwg、bitlwg guhdoih guhcaemz guh’angq, de hozhaenz dangqmaz. Baezneix, de gvai lo, de menhmenh byaij gvaqbae, doiq gyoengq gaeqlwg、bitlwg naeuz: “Gaeq dahnuengx, bit daegnuengx, raeuz guh baengzyoux ndei ba. ” Gaeqmeh mbe fwed buetfafa gvaqdaeuj, simgip dwk hongz malwg naeuz:“Liz lwg gou gyae di!” Youh daengq gyoengq gaeqlwg bitlwg naeuz: “Duzde yaeuh sou, gaej saenq de!” Bitmeh hix hongz malwg naeuz: “Duzma couh dwg yakdoeg simgei lai, siengj yaeuh gyoengq lwg dou, vaiq deuz!”

Malwg naj nding dwk euq naeuz: “Gou dwg caensim caen’eiq caeuq daihgya guh baengzyoux bw, daxmeh gou gangj seiz gaenjgip dou lij bang ndaej sou ne.”

Gaeqmeh caeuq bitmeh dingq le nyaenx mbouj ndaej caezsing riu naeuz:“Duzma bang dou? Gaej haeb dou suenq ndei lo!”

Malwg doeknaiq raixcaix, youh dauqma cam daxmeh naeuz:“Gou dwg caensim caen’eiq ha, vihmaz gyoengqde mbouj saenq gou ne?” Daxmeh naeuz:“Mboujguenj mwngz geijlai caensim caen’eiq, caengz guh daengz, vunz cungj gojnaengz ngeiz mwngz. Gaej haeujsim gij vah neix, gaej doeknaiq. Saehsaed mbouj yungh euq, caj mwngz guh daengz le, gyoengqde couh saenq lo.”

Ngoenz ndeu, daihgya cingq youq laj daengngoenz dak ndit, duz romh ndeu fwt coemj roengzdaeuj, coemj dawz duz gaeqlwg ndeu, siengj dawz bae gwn. Gyoengq gaeq bit cungj swenjsasa ndoj mbouj gib. Malwg daraeh, mbouj caj daxmeh de hemq, couh lumj diuznaq nei cung hwnjbae, aj bak couh haeb duzromh, hwk ndaej duzromh vaiqvak mbeuj ndang baez bienq, bek fwed baez yat, ndek duz gaeqlwg deuzmingh bae lo.

Duz gaeqlwg ndaej gouq lo. Gaeqmeh daih’it boux buet gvaq- daeuj, de doq lox gaeqlwg doq docih malwg. Bitmeh hix gvaqdaeuj lo. Malwg angq dangqmaz, doiq songde naeuz:“Daxmeh gou naeuz, raeuz aeu guhdoih doxhuz doxbang. Daihgya cuengqsim ba, miz gou caeuq daxmeh youq gizneix, baezlaeng couh mbouj lau bouxcaeg duzromh lo.”

Daihgya cungj ciuz gvaqdaeuj lo, bouxboux cungj docih malwg gyaep duzromh deuz, sawj daihgya bingzan. Gaeqmeh caeuq bitmeh cungj nyinh- loek lo, songde haenh malwg naeuz: “Mwngz caen dwg boux baengzyoux ndei ndeu ha!”

Daj baezneix hwnj, malwg caeuq duzgaeq duzbit caencingq baenz baengzyoux ndei lo, gyoengqde ngoenzngoenz guhdoih guhcaemz guh- angq, doxhuz doxbang, doxndei dangqmaz. (Ganh Sozvwnz/甘说文)