Youq Dahyougyangh mbiengj baihnamz, aen ndoi vangq gwnz he, miz ndaek rin he yaek caeuq namh doxbingz, ndaek rin daih’iek miz 1.5 bingzmij, gwnz rin miz aen rizdin- gvaz vunz ndeu, haj cik lwgdin yawj ndaej cingcing cujcuj. Gvendaengz aen rizdin neix, miz aen riuzgangj he hawj vunz gig gamjdoengh.

Gangjnaeuz seizgonq, aen dieg neix miz 9 goengq byarin, youq gyoengq bya ndawde miz aen mbanj ndeu heuhguh Ginhcai, ndaw mbanj miz boux bouxcoz he gaenx guh sim swnh, gij coh de heuhguh Ahsanh. Ahsanh gaenq haujlai baez yiengq dahsau mbanj- wnq Ahgyauh camyah, hoeng, Ahgyauh cungj yiem Ginhcai bya lai reih noix, caemhcaiq ranz Ahsanh youh gungz youh rwix, baenzlawz cungj mbouj doengzeiq.

Gij vunz Ginhcai ndwenngoenz gvaq ndaej gig gungzhoj, hix menh- menh deuz okrog bae ra gwn lo. Hoeng, Ahsanh mboujdan mbouj deuz, vanzlij caen fwngz hai bya ndaem faex, cawz nya ndaem haeux, gietsim yungh 10 bi seizgan bae canh ngaenz caiq aeu yah.

Gienh saeh neix gingdoengh le Gvanhyinh, Gvanhyinh couh soengq hawj Ahsanh diuz “bien gyaep bya” ndeu, hawj de yungh diuz bien neix dawz 9 goengq byarin cienzbouh gyaep gvaq Dahyougyangh mbiengj baihbaek bae, gizneix couh bienq bingz lo, naz ndei caemhcaiq youq hix cwxcaih, cijaeu gaenx, ndwen- ngoenz couh itdingh gvaq ndaej ndei. Hoeng, yaek youq ranz caengz rongh seiz gyaep bya gvaq dah cij lingz.

Ahsanh ciuq vah Gvanhyinh daengq daeuj guh, yaengx bien gyaep byarin coh baihbaek bae. Seizhaenx 9 goengq byarin miz 8 goengq gaenq gvaq dah lo, lij lw goengq byarin ndeu. Ahsanh angq lai lo, yaengx bien haenqrengz couh luenh fad, miz geij bien fad doiq goengq bya neix, de couh byaij hwnjdaeuj lo. Byaij mbouj ndaej geij yamq, mbouj siengj daengz gij sing bien fad yiengj lai, gingdoengh liux gij gaeqboux mbanj henz, gaeqboux haen sing raez ndeu, heuh hwnj liux daengngoenz, daengngoenz couh menhmenh bin hwnj, mbwn daezgonq rongh lo. Doeklaeng goengq byarin neix dingz roengzdaeuj mbouj byaij lo. Ahsanh sim hix gip, ga gvaz haenqrengz daemh mbat din he, “aeyo” sing ndeu, swhgeij couh mbouj miz ingj mbouj miz riz lo, ndaek rin lajdin dauqfanj louz miz aen rizdin laeglaeg ndeu.

Seizneix, goengq byarin caengz gvaq dah gaenq deng caq bingz guh aen cangj daeuj swnghcanj lij, gyoengqvunz henz bya gvaq ndaej ndei dangqmaz, ranzranz miz ranz- laeuz, gya’gya hai ciiq, ndwen- ngoenz caeux couh mauhgvaq Gvanhyinh coh Ahsanh gangj haenx, fouzsoq boux Ahsanh cingq yien fwngz doengzcaez haenqrengz gensez ranzmbanj, gaenx guh rom ngaenz- cienz. Aen rizdin neix mbouj rox ginggvaq geijlai bi rumznae, ce youq dieg gaeuq yawj seizdaih gaijbienq.