Cungj naeuz vunz yied geq, couh yied siengj dauqbae daengz mwh lwgnyez. Gou seizneix couh gig siengj, nanzdauh gou geq la?

Mwh lwgnyez, ceiq hawj vunz angqyangz couhdwg gvaqcieng lo. Youq lajmbanj, ngamq haeuj seizdoeng couh hainduj muengh gvaqcieng. Daegbied dwg lwgnyez, gvaqcieng seizhaenx, gaj moucieng、suek faengx、daenj buh moq、cuengq bauq…… Yienghyiengh cungj mizyinx, ndigah laeqlaeq lwgnyez cungj muengh gvaqcieng. Vunzlaux、vunzhung hix ceiq haengj cungj ciengzmienh youh miz rengzhoengh youh angqyangz. “Bi moq daengz, caen nauhyied. Nungh buh moq, daenj mauh moq. Bili bala cuengq bauqrengh……” Seizneix, henz rwz gou youh yiengj hwnj aen go lij iq seiz lwgnyez ceiq maij ciengq.

Youq ranzmbanj gou, ndwenlab ngeihhaj couh hainduj gvaqcieng lo, itcig daengz ndwencieng cibhaj cij sat.

Gvaqcieng seiz, lwgnyez aenngoenz dan guenj sim’angq couh ndaej lo, hoeng, vunzhung cix nyaengq haeuj nyaengq ok, dinfwngz cungj mbouj ndaej daengx roengzdaeuj gvaq, ranzranz cungj baenzneix. Daxboh bag fwnz, gaj moucieng、suek faengx seiz aeu daeuj coemh feiz goenj raemx yungh, daxmeh suek faengx、siu laeuj、guh buh moq. Geiq ndaej gou 10 bi bihaenx ndwencieng, gou hainduj riengz daxmeh hag suek faengx. Daxmeh sien suek aen faengx iq ndeu hawj gou yawj, cij ndenq hawj gou 2 mbaw rongfaengx, heuh gou sawq suek yawjyawj. Yawj daxmeh suek ndaej baenzneix vaiqvit soengswt, gou laihnaeuz suek faengx gig ngaih, doiq gou mbouj miz maz vwndiz, ndigah couh gig miz saenqsim dawz hwnj 2 mbaw rongfaengx hag gij yiengh daxmeh suek faengx suek hwnjdaeuj. Hoeng, mboujlwnh gou baenzlawz suek hix suek mbouj baenz, mbouj dan naedhaeux conh okdaeuj, gij yiengh de hix yakyawj dangqmaz, gip ndaej gou yaek daej hwnjdaeuj. Hoeng, daxmeh cungj gig miz naihsim dwk baez dem baez nai gou naeuz:“Mbouj youqgaenj, menhmenh guh, mwngz cungj ndaej hag baenz.” Ngoenzhaenx, gou daengz mbwnlaep cij suek baenz aen faengx iq baenzyawj ndeu, hoeng, ndawsim cix angq raixcaix. Faengx dumq baenz lo, hai fa rek seiz, daxmeh aeu aen faengx gou suek okdaeuj gonq, daengx ranz vunz caez cimz, ndawsim gou gamjdaengz aen faengx gou suek neix beij aen bouxwnq suek lij hom, lij van.

Seizhaenx ranzmbanj gou lij caengz doeng dienh, mbouj miz souhyinhgih dingq, hix mbouj miz densi yawj, hoeng, cix gvaq ndaej beij seizneix nauhyied. Daengz haemhndaep seiz, daengx ranz vunz naengh youq henz aen daiz gwnhaeux diemj daeng youzhaeu, gyaet cehgve、dingq vunzlaux gangj gojgaeq, lwgnyez cungj haengj dingq aen sat lij aeu dingq aen. Dingq gvaq gojgaeq lij dwk baiz、gangj vahriu, ndaw ranz sing riu mbouj duenh, angqyangz dwk caj daengz cibngeih diemj. Vunzlaux cungj naeuz:“Youq daengz cibngeih diemj, ndaej cingsaenz daengx bi.”

Caeuq gizwnq mbouj doxdoengz, youq ranzmbanj gou, seiz baiqnienz dwg ndwencieng co’ngeih. Daengz ngoenz haenx vunz baiqnienz caen dwg mbouj dingz mbouj duenh, ranzranz cungj hawj vunz daeuj baiqnienz bwh ndei laeuj ranz bonjfaenh gag siu、nohgyaeujmou ngamq gaj、faengx、oij、dangz…… Ndwencieng co’ngeih itcig daengz ndwencieng cohaj, byaij youq gwnz roen cungj ndaej yawjraen gyoengqvunz bae baiqnienz, vunz lai vunz daih, mboujlwnh dwg byawz, mboujlwnh youq gyawz bungzraen cungj dwg riunyumnyum dwk hoh naeuz:“Bi moq ndei ha!” Youq ranzmbanj, baiqnienz dwg cungj conzdungj ndeu, daj ciuhgeq cienz roengzdaeuj, baenzbaenz cungj miz vunz daengz ranz baiqnienz. Gyoengqvunz youq hongq ranz ndeu, vunzlaux caeuq vunzhung gangjvah, lwgnyez roxnaeuz buet bae buet dauq, roxnaeuz comz youq giz gungx he guhcaemz, nauhyied fouzbeij.

Gou mbouj maij youq ndaw hawsingz hung gvaqcieng, mbouj miz gaj moucieng、mbouj miz daenj buhmoq、mbouj miz suek faengx daengj saeh neix, lumjnaeuz mbouj ndaej gvaqcieng nei. Mboujlwnh mwngz youq rog miz geijlai saetmuengh, miz maz vwndiz, bae daengz ranz gvaqcieng, naengh youq henz aen daiz gwnhaeux humx rim vunz ndaw ranz, yawj bouxboux cungj najriu, maqmuengh youh rimhoz lo, raeujrubrub dienz rim aen sim mwngz.

Gij feihdauh gvaqcieng mbouj youq gizwnq, de bonjlaiz couhdwg youq ndawsim gou, youq ndawsim mwngz, hix youq ndawsim de. Gij feihdauh gvaqcieng couhdwg daiq faenh maqmuengh、cungj rengzhoengh caeuq vunzcaen doxcomz.