Cuengq hanzgyaj lo, ndwen- cieng hix daeujdaengz lo. Daj liggaeuq ngeih geij hainduj, vunzhung cungj nyaengqnyatnyat lo, baetranz、suek faengx、cwng nienzgau、cawx nienzhuq……

Daengz ngoenzndaep gyang- haet, ranzranz cungj nem doiq, nem monzsaenz, gizgiz cungj dwg nauhnauh yiedyied. Daengz ban- haemh, daengx ranz vunz naengh youq doxcaez gwn caeuz ndaep, yienzhaeuh naengh youh naj densi yawj vanjvei lienzvuen ndwen- cieng. Vanjvei cezmuz gig lai, miz ciengqgo、diuqfoux、siengsingh、siujbinj、cazgi daengjdaengj. Daih- gya itmienh yawj densi itmienh gwn mak gwn dangz gaet cehgva, miz gangj miz riu, angq dangqmaz.

Seizgan gvaq ndaej gig vaiq, mbouj geij nanz daengz byongh- hwnz 12 diemj cung lo, singcung bi moq roq yiengj lo. Ranzranz cungj cit bauqrengh, cungq bauqva, gizgiz cungj dwg sing bauq bibi baba, bauqva cuengq daengz gyangmbwn lumj va hai nei gyaeundei raixcaix.

Singcung bi moq roq yiengj lo, raeuz coux daeuj bi moq ngoenz daih’it. Youq ndaw bi moq, gou maqmuengh daihgya bouxboux ndangcangq, gwndaenj vuenyungz, gou yaek ndeindei hagsib, guh boux hagseng ndei ndeu.

(Gveibingz Sihsanh Cin Cunghsinh Siujyoz 5 (1) ban Cwnz Cwzginh)