Gaxgonq, youq Bingzgoj Yen Haijcwngz Yangh Nazhaij Cunh miz boux singq Vangz he an lungzdeih, gyoengq beixnuengx caeuq baengzyoux cungj daengz henz, miz bak lai vunz. Dawz mou dawz gaeq daengz henz deih bae gaj, youh ndaej caeq cojcoeng youh ndaej cingj hek.

Banhaemh, an lungzdeih sat lo, gyoengqvunz hix gwn gaeuq lo, couh boux riengz boux daj gwnz bya ma ranz. Yaek dauq daengz ranz seiz, boux cawjranz roxnyinh fag caxbyaek de lumz youq gwnz bya henz deih, de ganjgip buet fan dauqbae aeu. Dauq daengz lajbya gaenq laep lo, hoeng caen geizheih, gizneix ronghsaksak, lumj gyangngoenz nei, doiqnaj de lij miz dahsau lengj ndeu cingq ciuq aen gingq daeuj cangndang. Yawjraen aen yienhsiengq neix, de hix mbouj miz sim caiq bae ra fag caxbyaek de lo.

De dauq daengz ranz seiz, gyoengq vunzmbanj ninz gvaq lo. De youq gwnz mbonq fan bae foek dauq, baenzlawz hix ninz mbouj ndaek. Haetlaeng, de caeuq gyoengq vunzmbanj gangj gij saeh neix, gyoengqde hix roxnyinh geizheih dahraix, ndigah couh heuh de daiq caezgya bae yawj.

De daiq cibgeij vunz daengz gizde yawj, boux dahsau lengj haenx mbouj raen lo, cij raen lai miz goengq bya gyaeundei ndeu. Doiqnaj goengq bya neix, lij miz aen mboq ndeu, aen bak mboq mwnzrad, raemx bingz lumj aen gingq nei. Gyoengqvunz cungj naeuz, boux dahsau lengj haenx bienqbaenz goengq bya gyaeundei neix, aen gingq de ciuq bienqbaenz aen mboqraemx lo.