Daxbuz gou gaenq 70 bi lo, de ndangdaej haemq nyieg, bingzseiz mbouj dwg gok neix in couhdwg gok haenx dot, haih ndaej de naengh hix naengh mbouj onj, ninz hix ninz mbouj ndaek. Bohmeh gou ciengzseiz cawx laeujyw hawj de gwn, cawx yw’nyaq hawj de oem, hoeng ngamq ndaej ndei saekseiz.

Bohmeh gou mbouj hawj daxbuz guh hong, hoeng daxbuz naeuz lwgda yawj mbouj ndaej, cungj siengj guh. Baez daengz hong nyaengq seiz, bohmeh bae ndaw reih ndaw naz guh hong, gou caeuq daxbuz youq ranz dak haeux、sou haeux. Yienghneix baenzngoenz roengzdaeuj, ndokndang daxbuz engq in lo. Gou haemhhaemh cungj bang daxbuz dub hwet, daxmeh bang de nap sa.

Daxmeh gou gyaez diuqfoux, haemhhaemh cungj daengz giuzcangz gyaeuj mbanj bae diuq. De ciengzseiz doiq daxbuz naeuz:“Daxmeh, diuqfoux ndaej lienhndang, ndokndang soeng, ninz hix ndaek lai, mwngz riengz gou bae diuq ba.” Daxbuz dingq le cungj ngauz gyaeuj naeuz:“Gou 70 bi lo, diuq maz foux, najmong lai, mbouj bae, mbouj bae.”

Miz haemh ndeu, daxmeh doiq gou naeuz:“Gwn haeuxcaeuz sat le, gou siengj daiq daxbuz mwngz bae diuqfoux, mwngz bang gou dungyenz de, rox lwi?” Gou bek aek doiq daxmeh naeuz:“Cuengqsim, gou rox lo.”

Vanjdawh sousib ndei le, daxmeh byaij daengz dangqnaj daxbuz naengh roengzdaeuj, gaem fajfwngz daxbuz, naeuz:“Meh, haemhneix ronghndwen ronghsaksak, gou daiq mwngz bae guhcaemz.” Gou hix sikhaek byaij gvaqbae, song fwngz gaem cik gen daxbuz, doq ngauz doq naeuz:“Daxbuz, daxbuz, vaiq caeuq gou bae guhcaemz.” Daxbuz yawjyawj daxmeh youh yawjyawj gou, riu naeuz:“Ndei, bae couh bae.”

Gou caeuq daxmeh angqvauvau dwk rex daxbuz daeuj daengz giuzcangz gyaeujmbanj. Gizneix gaenq miz haujlai vunz lo, vunzsai naengh youq henz giuzcangz gangjgoj; gyoengq vunzbaz, bang haemq oiq haenx diuqfoux, bang geq haenx diuq gensinhcauh. Gyoengq- vunz raen daxbuz gou daeuj, bouxboux cungj dongx diemzsubsub. Bang buzoiq buzgeq geij boux cungj rag daxbuz gou bae diuq gensinhcauh. Daxbuz launyaenq mbouj gamj diuq, hoeng yawjraen gyoengq vunzlaux caeuq swhgeij nienzgeij ca mbouj lai, gyoengqde diuq ndaej baenzneix gyaeu, de youh yawj dwk dawzyinx dangqmaz. Gou doiq daxbuz naeuz:“Daxbuz, gou son mwngz diuq.” Daxbuz ndwn youq baihlaeng gou, gou baez aen dungcoz baez aen dungcoz son de. Daxbuz uk soem, ngamq son geij baez couh rox lo. Couh yienghneix, song boux raeuz caeuq daihgya diuq bae geij aen cungdaeuz. Daxbuz diuq dwk buh dumz caez, de naeuz:“Va, gou naiq dwk mbouj miz saek di rengz lo.” Gangj sat couh naengh roengzdaeuj yietnaiq. Daxmeh byaij gvaqdaeuj, doiq daxbuz naeuz:“Meh, mwngz diuq ndaej caen gyaeu, baezlaeng haemhhaemh cungj daeuj.” Daxbuz doq riu doq uet hanh naeuz:“Ndei!”

Daj haemhhaenx hwnj, daxbuz haemhhaemh cungj bae caeuq bang vunzmeh diuq gensinhcauh, danghnaeuz noix haemh ndeu mbouj ndaej bae couh ninz mbouj ndaek. Genhciz daengz seizneix gaenq ndaej bi lai lo. Gij in dot daxbuz hix mbouj rox seizlawz siu bae lo. De bungz vunz couh gangj:“Moix ngoenz lienhndang aen cungdaeuz ndeu, maz yw hix mbouj yungh gwn.”

Seizneix, bouxvunz bae diuq gensinhcauh gaenq fazcanj daengz 20 lai vunz lo, Daxbuz gou dwg cujcangj bw!