Bi 2015 ndwen 11, Cungzcoj Si Ningzmingz Yen Cwngzcungh Cin Gveizdangz Cunh ndaej dingh baenz daengx guek 7 aen minz Gun song vah saw lajmbanj(segih) sawqdiemj danhvei ndawde aen ndeu. Bi lai daeuj, hong Cuengh Gun song vah saw huzndei sawqdiemj aen cunh neix cingzyauq yienhda.

It dwg gij leixniemh Cuengh Gun song vah saw huzndei cugyamq haeujlaeg simvunz, ginggvaq swcigih、 yienh、 yangh daegbied dwg youq mbanj suhgi daih’it caeuq cunh ganbu ciengzseiz haeuj mbanj guh hong senhconz Cuengh Gun song vah saw huzndei, hawj gij gvanhnen caeuq yisiz minzcuz doxgiet、 vahgangj bingzdaengj ganbu vunzlai Gveizdangz Cunh ndaej dem’ak, caemhcaiq youq bingzseiz guh hong gvaq saedceij gagrox bae guh.

Ngeih dwg ganbu vunzlai gak cuz Gveizdangz Cunh gagnyienh gagrox hagsib caeuq yungh vah saw guekgya doeng’yungh nem Vahcuengh Sawcuengh, ndaw mbanj Vahcuengh caeuq vah saw guekgya doeng’yungh nem Begvah、 Vahmaxgai、 Vahvengz- dangz vahdeihfueng Vahgun dox nyinhdoengz, gvanhaeh huzndei.

Sam dwg ganbu vunzlai gak cuz Gveizdangz Cunh yungh vah saw guekgya doeng’yungh ndaej daezsang haemq hung. Riengzdwk densi、 souj- gih、 vangjdoxlienz cugyamq cienzdoh nem lajmbanj gak cuz vunzlai guh hong gvaq saedceij aeu yungh. Seizneix, ndaw mbanj gak minzcuz vunzlai doxgyau seiz gagrox yungh Vahbuj- dungh caeuq Begvah vahdeihfueng Vahgun yienhsingz doeng’yungh haenx, miz yied daeuj yied lai vunz gak minzcuz rox Vahgun Sawgun.

Seiq dwg vwnzva Vahcuengh ndaej baujhoh、 swnjcienz caeuq hwngfat haemq ndei. Lai bi daeuj, binaengz ndwencieng、 liggaeuq sam nyied sam, daegbied dwg liggaeuq ndwen roek ngeihseiq ciet gobo Gveizdangz geizgan, vunzlai gagfat eu fwen、 diuq fouxgvangjcangz lienhndang、 dwk lanzgiuz daengj hozdung lai cungj lai yiengh. (Liu Hihfangh/廖熙芳 Sinh Gyahbingz/申家萍)